ഹെറോയിൻ ഒളിപ്പിച്ച 16 സോപ്പ് പെട്ടികൾ പിടികൂടി
![Soap](https://timeofkerala.com/static/c1e/client/98493/uploaded/1ff8aa622e8ead4eec320fa3e3c7dbb5.png)
പാലക്കാട്: പാലക്കാട് ജങ്ഷൻ റെയിൽവേ സ്റ്റേഷനിൽ വൻ മയക്കുമരുന്ന് വേട്ട. ട്രെയിനിൽ നിന്ന് 1.20 കോടി രൂപയുടെ ഹെറോയിൻ പിടികൂടി. പാലക്കാട് ആർപിഎഫ് ക്രൈം ഇൻ്റലിജൻസ് വിഭാഗവും എക്സൈസ് എൻഫോഴ്സ്മെൻ്റും ആൻ്റി നാർക്കോട്ടിക് സ്പെഷ്യൽ സ്ക്വാഡും സംയുക്തമായി 164 ഗ്രാം ഹെറോയിൻ പിടികൂടി.
പട്ന-എറണാകുളം എക്സ്പ്രസിൻ്റെ മുൻ ജനറൽ കോച്ചിൽ ഉപേക്ഷിച്ച നിലയിൽ കണ്ടെത്തിയ കറുത്ത ബാഗ് പരിശോധിച്ചപ്പോൾ തുണിയിൽ പൊതിഞ്ഞ നിലയിൽ 16 സോപ്പ് ബോക്സുകൾ കണ്ടെത്തി. തുറന്ന് നോക്കിയപ്പോൾ ഹെറോയിൻ അടങ്ങിയതായി കണ്ടെത്തി. എക്സൈസും കേസെടുത്ത് അന്വേഷണം ആരംഭിച്ചു.
തിരഞ്ഞെടുപ്പ്, ഉത്സവ സീസണുകളുടെ വെളിച്ചത്തിൽ വരും ദിവസങ്ങളിലും കർശന പരിശോധന തുടരുമെന്ന് അധികൃതർ അറിയിച്ചു. പാലക്കാട് ആർപിഎഫ് ക്രൈം ഇൻ്റലിജൻസ് വിഭാഗം ഇൻസ്പെക്ടർ എൻ കേശവദാസ്, എക്സൈസ് എൻഫോഴ്സ്മെൻ്റ് ആൻഡ് ആൻറി നാർകോട്ടിക് സ്പെഷൽ സ്ക്വാഡ് സർക്കിൾ ഇൻസ്പെക്ടർ എജിജി പോൾ എന്നിവർ പരിശോധനയ്ക്ക് നേതൃത്വം നൽകി.
ആർപിഎഫ് ക്രൈം ഇൻ്റലിജൻസ് വിംഗ് സബ് ഇൻസ്പെക്ടർമാരായ എ പി ദീപക്, എ പി അജിത് അശോക്, പി ടി ബാലസുബ്രഹ്മണ്യൻ, എഎസ്ഐ കെ എം ഷിജു, ഹെഡ് കോൺസ്റ്റബിൾമാരായ എൻ അശോക്, ഒ കെ അജീഷ്, കോൺസ്റ്റബിൾ പി പി അബ്ദുൾ സത്താർ, എക്സൈസ് പ്രിവൻ്റീവ് ഓഫീസർമാരായ പി പി ഗോകുലകുമാരൻ, ഷൈബു, കെ കെ ഗോപിനാഥൻ, എം എസ് ഗോപിനാഥൻ, എം. ഡ്രൈവർ എം വിനീഷ് എന്നിവർ പരിശോധനയിൽ പങ്കെടുത്തു.