11 വർഷത്തിനിടെ കേരള തീരത്ത് 469 മത്സ്യത്തൊഴിലാളികൾ മരിച്ചു; 160 പേരെ കാണാതായി, 47,773 പേരെ രക്ഷപ്പെടുത്തി

കഴിഞ്ഞ 11 വർഷത്തിനിടെ കേരള തീരത്ത് 469 മത്സ്യത്തൊഴിലാളികൾ മരണപ്പെടുകയും 160 പേരെ കാണാതാവുകയും ചെയ്തതായി സംസ്ഥാന സർക്കാരിന്റെ കണക്കുകൾ. 2015-16 മുതൽ 2025-26 വരെയുള്ള കാലയളവിലെ വിവരങ്ങളാണ് പുറത്തുവിട്ടത്.

ഇതിനിടെ കേരള മറൈൻ ഫിഷറീസ് റെഗുലേഷൻ എൻഫോഴ്‌സ്‌മെന്റിന്റെ ഭാഗമായി 23,000-ത്തിലധികം പട്രോളിങ് പ്രവർത്തനങ്ങളും 5,072 കടൽ രക്ഷാദൗത്യങ്ങളും നടത്തി. ഈ രക്ഷാപ്രവർത്തനങ്ങളിലൂടെ ആകെ 47,773 മത്സ്യത്തൊഴിലാളികളെ സുരക്ഷിതമായി രക്ഷപ്പെടുത്തിയതായും സർക്കാർ അറിയിച്ചു.

സമീപകാലത്ത് മത്സ്യത്തൊഴിലാളികളെ കാണാതായ സംഭവങ്ങളെ തുടർന്ന് തീരദേശ മേഖലയിൽ പ്രതിഷേധം ശക്തമായ സാഹചര്യത്തിലാണ് സർക്കാർ ഈ കണക്കുകൾ പുറത്തുവിട്ടത്. പ്രതികൂല കാലാവസ്ഥയിൽ മത്സ്യബന്ധനത്തിന് പോകുന്നവർ ജാഗ്രത പാലിക്കണമെന്നും സുരക്ഷാ നിർദേശങ്ങൾ കർശനമായി പാലിക്കണമെന്നും അധികൃതർ അഭ്യർഥിച്ചു.