നടി ആക്രമണക്കേസ്: പൾസർ സുനിയുടെ ജാമ്യത്തിന് എതിർത്ത് സർക്കാർ

നടി ആക്രമണക്കേസിലെ മുഖ്യപ്രതിയായ പൾസർ സുനിയുടെ ശിക്ഷ സസ്‌പെൻഡ് ചെയ്ത് ജാമ്യം അനുവദിക്കണമെന്ന ഹർജിയെ ശക്തമായി എതിർത്ത് കേരള സർക്കാർ ഹൈക്കോടതിയിൽ. കേസുമായി ബന്ധപ്പെട്ട അതീവ രഹസ്യ സ്വഭാവമുള്ള ദൃശ്യങ്ങൾ പുറത്തുപോകാൻ സാധ്യതയുണ്ടെന്നും, ജാമ്യം അനുവദിച്ചാൽ കേസിന്റെ ഗൗരവത്തെ ബാധിക്കാമെന്നുമാണ് സർക്കാർ കോടതിയെ അറിയിച്ചത്. 

അതിജീവിതയുടെ സ്വകാര്യതയും സുരക്ഷയും മുൻനിർത്തിയാണ് സർക്കാർ നിലപാട് സ്വീകരിച്ചത്. കേസിലെ പ്രധാന തെളിവായ ദൃശ്യങ്ങൾ ദുരുപയോഗം ചെയ്യപ്പെടാനോ ചോരാനോ സാധ്യതയുണ്ടെന്നും, അത്തരമൊരു സാഹചര്യം ഉണ്ടാകുന്നത് അതിജീവിതയ്ക്ക് വീണ്ടും മാനസിക ആഘാതമുണ്ടാക്കുമെന്നും പ്രോസിക്യൂഷൻ കോടതിയിൽ ചൂണ്ടിക്കാട്ടി. 

പൾസർ സുനിക്കായി ഹാജരായ അഭിഭാഷകൻ ശിക്ഷ സസ്‌പെൻഡ് ചെയ്ത് ഇടക്കാല ജാമ്യം അനുവദിക്കണമെന്ന് ആവശ്യപ്പെട്ടപ്പോൾ, സർക്കാർ അഭിഭാഷകനും അതിജീവിതയ്ക്കായി ഹാജരായ അഭിഭാഷകയും അതിനെ എതിർത്തു. ഇരുവിഭാഗത്തിന്റെയും വിശദമായ വാദം കേട്ട ഹൈക്കോടതി ഹർജിയിലെ വിധി പ്രസ്താവിക്കുന്നത് മാറ്റിവച്ചു. 

2017-ൽ നടന്ന നടി ആക്രമണക്കേസിൽ പൾസർ സുനി ഉൾപ്പെടെ ആറു പ്രതികൾക്ക് എറണാകുളം പ്രിൻസിപ്പൽ സെഷൻസ് കോടതി 20 വർഷം തടവ് ശിക്ഷ വിധിച്ചിരുന്നു. ഈ ശിക്ഷ സസ്‌പെൻഡ് ചെയ്യണമെന്ന ആവശ്യവുമായാണ് സുനി ഹൈക്കോടതിയെ സമീപിച്ചിരിക്കുന്നത്.