തിരുവനന്തപുരത്തെ മാറ്റാൻ ഒരുങ്ങി അദാനി ഗ്രൂപ്പ്; നിരവധി തൊഴിൽ അവസരങ്ങൾ

തിരുവനന്തപുരം: തലസ്ഥാന നഗരിയിൽ വൻ വികസനത്തിന് വഴിയൊരുക്കി കൂടുതൽ പദ്ധതികളുമായി അദാനി ഗ്രൂപ്പ്. ഹോസ്പിറ്റാലിറ്റി, റീട്ടെയിൽ മേഖലകളിൽ ചുവടുറപ്പിക്കുന്നതിൻ്റെ ഭാഗമായി തിരുവനന്തപുരം ഉൾപ്പെടെയുള്ള രാജ്യത്തെ വൻ നഗരങ്ങളിൽ കൂടുതൽ സ്ഥലം ഏറ്റെടുക്കാനുള്ള നടപടികളുമായി അദാനി ഗ്രൂപ്പ് മുന്നോട്ടുപോകുകയാണെന്ന് റിപ്പോർട്ടുകൾ. 

വിമാനത്താവളങ്ങൾക്ക് സമീപം ഷോപ്പിംഗ് മാളുകൾ, റെസ്റ്റോറൻ്റുകൾ, മൾട്ടിപ്ലക്സുകൾ തുടങ്ങിയവ സ്ഥാപിക്കുകയാണ് ലക്ഷ്യം. തിരുവനന്തപുരത്തിന് പുറമെ മുംബൈ, ലഖ്‌നൗ, അഹമ്മദാബാദ്, ജയ്പൂർ എന്നിവിടങ്ങളിലും പുതിയ വാണിജ്യ കേന്ദ്രങ്ങൾ സ്ഥാപിക്കുമെന്ന് റിപ്പോർട്ട് സൂചിപ്പിക്കുന്നു.

തിരുവനന്തപുരത്ത് രണ്ട് ഏക്കർ ഭൂമി ആദ്യഘട്ടത്തിൽ ഏറ്റെടുത്തതായി ഒരു സാമ്പത്തിക മാധ്യമം റിപ്പോർട്ട് ചെയ്തു. മുംബൈയിൽ 160 ഏക്കറും ലഖ്‌നൗവിൽ 100 ഏക്കറും നവി മുംബൈയിൽ 200 ഏക്കറും ജയ്പൂരിൽ 17 ഏക്കറും അദ്ദേഹം ഏറ്റെടുക്കും.

ഇതോടൊപ്പം നിലവിൽ അദാനി ഗ്രൂപ്പ് ഏറ്റെടുക്കുന്ന തിരുവനന്തപുരം ഉൾപ്പെടെയുള്ള വിമാനത്താവളങ്ങളുടെ വികസനത്തിന് സമീപഭാവിയിൽ വൻ മൂലധന നിക്ഷേപം ഉണ്ടായേക്കുമെന്നും റിപ്പോർട്ടുകളുണ്ട്. 

അടുത്ത 5-10 വർഷത്തിനുള്ളിൽ ഇത് സംഭവിക്കുമെങ്കിലും ഇക്കാര്യത്തിൽ ഔദ്യോഗിക സ്ഥിരീകരണം ലഭിച്ചിട്ടില്ല. വിമാനത്താവളങ്ങൾക്ക് സമീപം റീട്ടെയിൽ, ഹോസ്പിറ്റാലിറ്റി കേന്ദ്രങ്ങൾ ആരംഭിക്കുന്നത് പ്രദേശവാസികൾ ഉൾപ്പെടെ നിരവധി പേർക്ക് തൊഴിലവസരങ്ങൾക്ക് വഴിയൊരുക്കും.

തിരുവനന്തപുരം ഇൻ്റർനാഷണൽ എയർപോർട്ട് ടെർമിനലിനു സമീപം പഞ്ചനക്ഷത്ര ഹോട്ടലും എയർ ട്രാഫിക് കൺട്രോൾ ടവറും നിർമിക്കാൻ അദാനി ഗ്രൂപ്പ് പദ്ധതിയിടുന്നതായി നേരത്തെ റിപ്പോർട്ടുകളുണ്ടായിരുന്നു. ഹോട്ടലിൽ 240 മുറികളുണ്ടാകുമെന്നാണ് റിപ്പോർട്ട്. 

നിലവിൽ കേരളത്തിലെ ഒരു വിമാനത്താവളത്തിനടുത്തും ഇത്തരം എലൈറ്റ് ഹോട്ടലുകൾ ഇല്ല. പൈലറ്റുമാരും എയർ ഹോസ്റ്റസുമാരും ഇപ്പോൾ തലസ്ഥാന നഗരത്തിൽ നിന്ന് അകലെയുള്ള ഹോട്ടലുകളിലാണ് താമസിക്കുന്നത്. എയർപോർട്ടിന് സമീപം തങ്ങാൻ കഴിഞ്ഞാൽ സമയനഷ്ടം കുറയ്ക്കാനാകും. ഗതാഗതക്കുരുക്കും മറ്റും കാരണം ഇവരെ താമസിക്കുന്ന ഹോട്ടലുകളിൽ നിന്ന് കൃത്യസമയത്ത് വിമാനത്താവളത്തിലെത്തിക്കുന്നത് വലിയ പ്രശ്‌നമാണ്.

വിമാനത്താവളത്തിന് സമീപമുള്ള എലൈറ്റ് ഹോട്ടലുകളും വിദേശികൾക്ക് പ്രയോജനകരമാകും. ഹോട്ടൽ സമുച്ചയം വരുന്നതോടെ തലസ്ഥാന നഗരിയുടെ മൊത്തത്തിലുള്ള വികസനം സാധ്യമാകും, കൂടാതെ തൊഴിലവസരങ്ങളും ഉണ്ടാകും. 

വിഴിഞ്ഞം തുറമുഖം തന്നെ തലസ്ഥാന നഗരിയുടെ മുഖഛായ തന്നെ മാറ്റി.   ദ്രുതഗതിയിലുള്ള ദേശീയപാത നവീകരണം പൂർത്തിയാകുന്നതോടെ തലസ്ഥാന നഗരത്തിൻ്റെ വികസനം കൂടുതൽ വേഗത്തിലാകും. കൊച്ചി പോലെ തലസ്ഥാന നഗരിയിലും മെട്രോ ട്രെയിൻ പദ്ധതി നടപ്പാക്കുന്നത് സർക്കാരിൻ്റെ സജീവ പരിഗണനയിലാണ്. ഇക്കാര്യത്തിൽ ഉടൻ തീരുമാനമുണ്ടാകുമെന്നാണ് സൂചന.