തിരുവല്ലയിൽ ബൈക്ക് യാത്രികൻ്റെ കഴുത്ത് കയറിൽ കുരുങ്ങി മരിച്ചു

ആലപ്പുഴ: തിരുവല്ലയിൽ മരം മുറിക്കാനുപയോഗിച്ച കയറിൽ കഴുത്ത് കുരുങ്ങി ബൈക്ക് യാത്രികൻ മരിച്ചു. തിരുവല്ല മുത്തൂരിലാണ് സംഭവം. ആലപ്പുഴ തകഴി സ്വദേശി സയ്യിദ് (32) ആണ് മരിച്ചത്. ഭാര്യയ്ക്കും രണ്ട് കുട്ടികൾക്കുമൊപ്പം യാത്ര ചെയ്യവെയാണ് അപകടമുണ്ടായത്.

മുത്തൂർ സ്‌കൂൾ വളപ്പിന് സമീപത്തെ മരം കയറുപയോഗിച്ച് വെട്ടിമാറ്റാനുള്ള ശ്രമത്തിലായിരുന്നു. അതിനിടയിൽ സയ്യിദും കുടുംബവും വഴി കടന്നുപോകുമ്പോൾ കയർ കഴുത്തിൽ കുരുങ്ങി. ഭാര്യയും മക്കളും നിസാര പരിക്കുകളോടെ രക്ഷപ്പെട്ടപ്പോൾ സയ്യിദ് ഗുരുതരമായി പരിക്കേറ്റ് റോഡിൽ വീണു.

ഇപ്പോൾ ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹം പോസ്റ്റ്‌മോർട്ടത്തിന് ശേഷം കുടുംബത്തിന് വിട്ടുനൽകും. അശ്രദ്ധമായി പെരുമാറിയതിന് കരാറുകാരനെതിരെയും മരം മുറിക്കുന്നവർക്കെതിരെയും പൊലീസ് കേസെടുക്കും.