കുസാറ്റിൽ ചിക്കൻപോക്സ് പടരുന്നു; സ്കൂൾ ഓഫ് എൻജിനീയറിങ്ങിലെ ക്ലാസുകൾ ഒരാഴ്ച ഓൺലൈനാക്കി

കൊച്ചി: കൊച്ചിൻ യൂണിവേഴ്സിറ്റി ഓഫ് സയൻസ് ആൻഡ് ടെക്നോളജിയിലെ സ്കൂൾ ഓഫ് എൻജിനീയറിങ്ങിൽ ചിക്കൻപോക്സ് കേസുകൾ റിപ്പോർട്ട് ചെയ്തതിനെ തുടർന്ന് ക്ലാസുകൾ ഒരാഴ്ചത്തേക്ക് ഓൺലൈനാക്കി. വിദ്യാർഥികളുടെ സുരക്ഷ മുൻനിർത്തിയാണ് നേരിട്ടുള്ള ക്ലാസുകൾ താൽക്കാലികമായി നിർത്തിവച്ചത്.

ക്യാമ്പസിൽ നിരവധി വിദ്യാർഥികൾക്ക് രോഗബാധ സ്ഥിരീകരിച്ചതിനെ തുടർന്നാണ് അധികൃതർ നടപടി സ്വീകരിച്ചത്. രോഗം കൂടുതൽ പേരിലേക്ക് പകരാനുള്ള സാധ്യത കണക്കിലെടുത്താണ് ഓൺലൈൻ ക്ലാസുകളിലേക്ക് മാറാൻ തീരുമാനിച്ചത്.

രോഗബാധിതരുമായി അടുത്ത സമ്പർക്കം പുലർത്തിയ വിദ്യാർഥികളോട് ആരോഗ്യനില നിരീക്ഷിക്കാനും രോഗലക്ഷണങ്ങൾ പ്രകടമായാൽ ആരോഗ്യപ്രവർത്തകരുടെ നിർദേശം തേടാനും നിർദേശിച്ചിട്ടുണ്ട്.

ക്യാമ്പസിലെ സ്ഥിതിഗതികൾ ആരോഗ്യവകുപ്പും സർവകലാശാല അധികൃതരും നിരീക്ഷിച്ചുവരികയാണ്. രോഗവ്യാപനം നിയന്ത്രണവിധേയമാകുന്നതനുസരിച്ച് നേരിട്ടുള്ള ക്ലാസുകൾ പുനരാരംഭിക്കുന്ന കാര്യത്തിൽ തീരുമാനമെടുക്കും.

വിദ്യാർഥികളിൽ രോഗവ്യാപനം തടയുന്നതിനായി ശുചിത്വവും മുൻകരുതൽ നടപടികളും പാലിക്കണമെന്ന് അധികൃതർ നിർദേശിച്ചു.