കോറോഹെൽത്ത് പിരിച്ചുവിടൽ വിവാദം; കേരള സർക്കാർ നടത്തിയ ചർച്ചയ്ക്ക് പിന്നാലെ നഷ്ടപരിഹാരം വർധിപ്പിച്ച് കമ്പനി

കേരള സർക്കാരിന്റെ മധ്യസ്ഥതയിൽ നടന്ന ചർച്ചകൾക്ക് പിന്നാലെ കോറോഹെൽത്ത് (CorroHealth) പിരിച്ചുവിട്ട ജീവനക്കാർക്കുള്ള നഷ്ടപരിഹാര പാക്കേജ് കമ്പനി മെച്ചപ്പെടുത്തി. നേരത്തെ പ്രഖ്യാപിച്ച ആനുകൂല്യങ്ങൾക്ക് പുറമെ അഞ്ച് മാസത്തെ ഗ്രോസ് ശമ്പളം കൂടി നൽകാൻ കമ്പനി സമ്മതിച്ചതായി തൊഴിൽമന്ത്രി ബിന്ദു കൃഷ്ണ അറിയിച്ചു. നഷ്ടപരിഹാര തുക ജൂലൈ 26-നകം ജീവനക്കാരുടെ അക്കൗണ്ടിൽ എത്തിക്കുമെന്നും വ്യക്തമാക്കി. 

കൊച്ചി, കോഴിക്കോട് കേന്ദ്രങ്ങളിൽ നിന്ന് പിരിച്ചുവിട്ട ഏകദേശം 850 ജീവനക്കാർക്കാണ് ഈ ആനുകൂല്യം ലഭിക്കുക. അനുഭവസാക്ഷ്യപത്രം, റിലീവിംഗ് ലെറ്റർ, ഫോം-16, ഫുൾ ആൻഡ് ഫൈനൽ സെറ്റിൽമെന്റ് രേഖകൾ എന്നിവയും പ്രതികൂല പരാമർശങ്ങളില്ലാതെ നൽകാനും കമ്പനി സമ്മതിച്ചു. പുതിയ തൊഴിലിനായി അപേക്ഷിക്കുന്നവർക്ക് ആവശ്യമായ ബാക്ക്ഗ്രൗണ്ട് വെരിഫിക്കേഷനും കമ്പനി നടത്തും. 

സംസ്ഥാന സർക്കാരിന്റെ ഇടപെടലും ജീവനക്കാരുടെ പ്രതിനിധികളുമായും ട്രേഡ് യൂണിയനുകളുമായും നടത്തിയ തുടർച്ചയായ ചർച്ചകളുടെയും ഫലമായാണ് ധാരണയിലെത്തിയതെന്ന് മന്ത്രി പറഞ്ഞു. ധാരണാപത്രത്തിൽ ജൂലൈ 26-ന് കമ്പനിയുടെയും ജീവനക്കാരുടെയും പ്രതിനിധികൾ ഒപ്പുവെക്കും.