എബോള ആശങ്കയ്ക്ക് വിരാമം; ദക്ഷിണ സുഡാനിൽ നിന്ന് എത്തിയ കോട്ടയം സ്വദേശിനിയുടെ പരിശോധനാഫലം നെഗറ്റീവ്

ദക്ഷിണ സുഡാനിൽ നിന്ന് കേരളത്തിലെത്തിയതിനെ തുടർന്ന് എബോള രോഗലക്ഷണങ്ങളെ തുടർന്ന് നിരീക്ഷണത്തിലായിരുന്ന കോട്ടയം സ്വദേശിനിയുടെ പരിശോധനാഫലം നെഗറ്റീവായി. ഇതോടെ സംസ്ഥാനത്ത് ഉയർന്നിരുന്ന എബോള ആശങ്കയ്ക്ക് താൽക്കാലിക വിരാമമായി. 

പനി ഉൾപ്പെടെയുള്ള അസ്വസ്ഥതകൾ അനുഭവപ്പെട്ടതിനെ തുടർന്ന് പാലായിലെ സ്വകാര്യ ആശുപത്രിയിൽ ചികിത്സ തേടിയ ഇവരെ ആരോഗ്യവകുപ്പിന്റെ നിർദേശപ്രകാരം കോട്ടയം മെഡിക്കൽ കോളേജിലെ പ്രത്യേക ഐസൊലേഷൻ വാർഡിലേക്ക് മാറ്റുകയായിരുന്നു. അന്താരാഷ്ട്ര ആരോഗ്യസുരക്ഷാ മാനദണ്ഡങ്ങൾ പാലിച്ചാണ് ഇവരെ നിരീക്ഷണത്തിലാക്കിയത്. 

പൂനെയിലെ നാഷണൽ ഇൻസ്റ്റിറ്റ്യൂട്ട് ഓഫ് വൈറോളജിയിൽ (NIV) നടത്തിയ പരിശോധനയിലാണ് എബോള വൈറസ് ബാധയില്ലെന്ന് സ്ഥിരീകരിച്ചത്. പരിശോധനാഫലം നെഗറ്റീവായതിനെ തുടർന്ന് യുവതിയെ ആശുപത്രിയിൽ നിന്ന് ഡിസ്ചാർജ് ചെയ്തു. 

ആഫ്രിക്കൻ രാജ്യങ്ങളിൽ നിന്ന് എത്തുന്ന യാത്രക്കാരെ മുൻകരുതലിന്റെ ഭാഗമായി നിരീക്ഷിക്കുന്നത് ആരോഗ്യവകുപ്പിന്റെ പതിവ് നടപടിക്രമമാണെന്നും നിലവിൽ സംസ്ഥാനത്ത് എബോള ഭീഷണിയില്ലെന്നും ആരോഗ്യവകുപ്പ് വ്യക്തമാക്കി. പൊതുജനങ്ങൾ അനാവശ്യ ആശങ്കപ്പെടേണ്ട സാഹചര്യമില്ലെന്നും അധികൃതർ അറിയിച്ചു.