ബിജെപി നേതാക്കളെ പുറത്താക്കിയെന്ന വ്യാജ സർക്കുലർ
സംസ്ഥാന ബിജെപി നേതാക്കളെ സ്ഥാനങ്ങളിൽ നിന്ന് നീക്കിയെന്ന തരത്തിൽ പാർട്ടിയുടെ ലെറ്റർഹെഡിൽ വ്യാജ സർക്കുലർ പ്രചരിപ്പിച്ച സംഭവത്തിൽ സമഗ്ര അന്വേഷണം ആവശ്യപ്പെട്ട് കേരള ബിജെപി സംസ്ഥാന പൊലീസ് മേധാവിക്ക് പരാതി നൽകി. വ്യാജ രേഖ തയ്യാറാക്കി പാർട്ടിയെ അപകീർത്തിപ്പെടുത്താൻ ശ്രമിച്ചതായി പരാതിയിൽ ആരോപിക്കുന്നു.
വ്യാജ ലെറ്റർഹെഡ് ഉപയോഗിച്ചാണ് തെറ്റായ വിവരങ്ങൾ പ്രചരിപ്പിച്ചതെന്നും ഇതിന് പിന്നിലുള്ളവരെ കണ്ടെത്തി നിയമനടപടി സ്വീകരിക്കണമെന്നും ബിജെപി ആവശ്യപ്പെട്ടു.
അതേസമയം, തിരഞ്ഞെടുപ്പ് ഫണ്ടുമായി ബന്ധപ്പെട്ട സാമ്പത്തിക ക്രമക്കേടുകളുടെ പേരിൽ നേതാക്കൾക്കെതിരെ നടപടി സ്വീകരിച്ചെന്ന പ്രചാരണം പാർട്ടി നിഷേധിച്ചു. ചില പരാതികളിൽ സംഘടനാപരമായ അച്ചടക്ക നടപടികൾ ഉണ്ടായിട്ടുണ്ടെങ്കിലും സാമ്പത്തിക ക്രമക്കേടിന്റെ പേരിൽ യാതൊരു നടപടിയും സ്വീകരിച്ചിട്ടില്ലെന്നാണ് ഔദ്യോഗിക വിശദീകരണം.
