കാൽപ്പാടുകളും കടലാസ് കഷ്ണങ്ങളും; തിരുവാതുക്കൽ ഇരട്ടക്കൊലപാതകക്കേസിൽ കിണർ വറ്റിച്ച് പരിശോധിക്കാൻ പോലീസ്

കോട്ടയം: തിരുവാതുക്കൽ ഇരട്ടക്കൊലപാതകം നടന്ന വീട്ടിലെ കിണർ പരിശോധിക്കാൻ പോലീസ് ഒരുങ്ങുന്നു. വെള്ളം വറ്റിച്ച് കിണറ്റിൽ തിരച്ചിൽ നടത്താനാണ് തീരുമാനം. സിസിടിവിയുടെ ഡിവിആർ കണ്ടെത്താനുള്ള തിരച്ചിലിന്റെ ഭാഗമായാണ് പരിശോധന. പ്രതികൾ കിണറിനടുത്ത് എത്തിയതിന്റെ സൂചനകൾ പോലീസിന് ലഭിച്ചു. കാൽപ്പാടുകളും കടലാസ് കഷ്ണങ്ങളും കിണറിനടുത്ത് നിന്ന് കണ്ടെത്തി.

വ്യവസായി വിജയകുമാറിനെയും ഭാര്യ മീരയെയും ഇന്ന് രാവിലെ കൊല്ലപ്പെട്ട നിലയിൽ കണ്ടെത്തി. വിജയകുമാറിന്റെ മൃതദേഹം വീടിന്റെ ഹാളിൽ കിടന്നിരുന്നു. മീരയുടെ മൃതദേഹം കിടപ്പുമുറിയിലായിരുന്നു. രാവിലെ വീട്ടുജോലിക്കാരി എത്തിയപ്പോൾ ഇരുവരും മരിച്ച നിലയിൽ കണ്ടെത്തി. മൃതദേഹങ്ങൾ രക്തത്തിൽ കുളിച്ചുകിടക്കുകയായിരുന്നു. മുഖത്ത് ആയുധം മൂലമുണ്ടായ മുറിവുകളുണ്ടെന്ന് പോലീസ് പറഞ്ഞു.

അന്വേഷണത്തിനായി പ്രത്യേക സംഘത്തെ നിയോഗിച്ചിട്ടുണ്ട്. കോട്ടയം ഡിവൈഎസ്പിയുടെ നേതൃത്വത്തിലാണ് അന്വേഷണം പുരോഗമിക്കുന്നത്. പ്രതികളെക്കുറിച്ച് സൂചനയുണ്ടെന്നാണ് പോലീസിന്റെ പ്രതികരണം. ഒരാളെ കസ്റ്റഡിയിലെടുത്തതായും റിപ്പോർട്ടുണ്ട്.

ഇന്ദ്രപ്രസ്ഥ ഓഡിറ്റോറിയത്തിന്റെയും നഗരത്തിലെ മറ്റ് വ്യാപാര സ്ഥാപനങ്ങളുടെയും ഉടമയാണ് വിജയകുമാർ. പോലീസ് വീട് വിശദമായി പരിശോധിച്ചുവരികയാണ്. വീട്ടുജോലിക്കാരിയിൽ നിന്ന് പോലീസിന് പ്രാഥമിക വിവരം ലഭിച്ചു. പ്രതി കുടിയേറ്റക്കാരനാണെന്നാണ് പ്രാഥമിക വിവരം. കൊലപാതകത്തിലേക്ക് നയിച്ച വ്യക്തിവൈരാഗ്യമാണ് കാരണമെന്ന് സംശയിക്കുന്നതായും ഇത് സ്ഥിരീകരിക്കാൻ കൂടുതൽ സമയം ആവശ്യമാണെന്നും പോലീസ് പറഞ്ഞു.