പണിയ പാരമ്പര്യത്തിൽ നിന്ന് ഇൻസ്റ്റഗ്രാമിലേക്ക്

വയനാട്ടിലെ പണിയ സമുദായത്തിന്റെ പരമ്പരാഗത ആഭരണങ്ങളെ ആധുനിക രൂപത്തിൽ അവതരിപ്പിച്ച് പുതിയ തലമുറയിലേക്ക് എത്തിക്കുകയാണ് സുൽത്താൻ ബത്തേരി സ്വദേശിനിയായ 24കാരി അപർണ രാജ്. മുത്തശ്ശി ചീരുവിൽ നിന്ന് കണ്ടുപഠിച്ച ആഭരണനിർമാണ പാരമ്പര്യമാണ് അപർണയുടെ സംരംഭത്തിന് പ്രചോദനമായത്. 

പണിയ സ്ത്രീകൾ പരമ്പരാഗതമായി ഉപയോഗിച്ചിരുന്ന കുന്നിക്കുരു, പൈൻ ഇലകൾ, തേനീച്ചമെഴുക് തുടങ്ങിയ വസ്തുക്കൾ ഉപയോഗിച്ചാണ് വിവിധ ആഭരണങ്ങൾ നിർമിച്ചിരുന്നത്. കുന്നിക്കുരു വിത്തുകൾ ഉപയോഗിച്ചുള്ള വലിയ കാതഭരണമായ ചൂത്തുമണി ഉൾപ്പെടെയുള്ള ആഭരണങ്ങൾ ഒരുകാലത്ത് പണിയ സമുദായത്തിന്റെ സംസ്കാരത്തിന്റെ ഭാഗമായിരുന്നു. എന്നാൽ കാലക്രമേണ ഇവ നിർമിക്കുകയും ഉപയോഗിക്കുകയും ചെയ്യുന്നവർ കുറഞ്ഞു. 

സ്കൂൾ വിദ്യാർഥികളെ പണിയ നൃത്തം പരിശീലിപ്പിക്കുന്നതിനിടെ പരമ്പരാഗത ആഭരണങ്ങൾ ലഭിക്കാൻ ബുദ്ധിമുട്ട് നേരിട്ടതാണ് അപർണയെ ഈ രംഗത്തേക്ക് കൂടുതൽ അടുപ്പിച്ചത്. തുടർന്ന് മുത്തശ്ശിയിൽ നിന്ന് ആഭരണനിർമാണം പഠിച്ച് പാരമ്പര്യത്തെ സംരക്ഷിക്കാനുള്ള ശ്രമം ആരംഭിച്ചു.

പരമ്പരാഗത ആഭരണങ്ങൾ വലുപ്പമേറിയതും ദൈനംദിന ഉപയോഗത്തിന് ബുദ്ധിമുട്ടുള്ളതുമാണെന്ന് മനസ്സിലാക്കിയ അപർണ അവയുടെ അടിസ്ഥാന രൂപവും സാംസ്കാരികതയും നിലനിർത്തിക്കൊണ്ട് പുതുതലമുറയ്ക്ക് ധരിക്കാൻ കഴിയുന്ന രീതിയിൽ പുനരാവിഷ്കരിച്ചു. ചൂത്തുമണി, മുടച്ചീല്, കല്ലുമാല, പണത്താലി തുടങ്ങിയ പരമ്പരാഗത ആഭരണങ്ങളുടെ ആധുനിക രൂപങ്ങളാണ് ഒരുക്കുന്നത്. ചില ആഭരണങ്ങളിൽ കുന്നിക്കുരുവിനൊപ്പം നിറമുള്ള ഷുഗർ ബീഡുകളും ഉപയോഗിക്കുന്നു. 

ഈ സംരംഭത്തിന് അപർണ ‘Panici’ എന്നാണ് പേര് നൽകിയിരിക്കുന്നത്. പണിയ ഭാഷയിൽ സ്ത്രീകളെ സ്നേഹപൂർവം വിളിക്കുന്ന പേരാണ് ‘Panici’. ഇൻസ്റ്റഗ്രാമിലൂടെയാണ് അപർണ തന്റെ ആഭരണങ്ങൾ പരിചയപ്പെടുത്തുന്നത്.

ഇത് ഒരു ആഭരണ ബിസിനസ് മാത്രമല്ലെന്നും പണിയ സമുദായത്തിന്റെ പാരമ്പര്യവും കലയും അടുത്ത തലമുറയിലേക്ക് കൈമാറാനുള്ള ശ്രമമാണെന്നും അപർണ പറയുന്നു. പൈതൃകസംരക്ഷണ രംഗത്ത് പ്രവർത്തിക്കുന്ന Archival and Research Project (ARPO)-യുടെ പിന്തുണയും അപർണയ്ക്ക് ലഭിക്കുന്നുണ്ട്. ഉൽപ്പന്ന വികസനം, സംരംഭകത്വം, വിപണനം, സോഷ്യൽ മീഡിയ തുടങ്ങിയ മേഖലകളിൽ സംഘടനയുടെ സഹായത്തോടെ സംരംഭത്തെ കൂടുതൽ മുന്നോട്ട് കൊണ്ടുപോകുകയാണ് അപർണ. 

പാരമ്പര്യത്തെ മ്യൂസിയത്തിൽ മാത്രം സൂക്ഷിക്കാതെ, ഇന്നത്തെ തലമുറയുടെ ജീവിതത്തിലേക്ക് കൊണ്ടുവരികയാണ് അപർണയുടെ ശ്രമം. വയനാടിന്റെ ഒരു പഴയ സാംസ്കാരിക അടയാളം ഇൻസ്റ്റഗ്രാമിലൂടെ പുതിയ തലമുറയിലേക്ക് എത്തിക്കുകയാണ് ഈ യുവ സംരംഭക.