‘ഇപ്പോൾ ഞാൻ ഒറ്റയ്ക്കാണ്’; വി.ഡി. സതീശനെതിരായ വിമർശനത്തിൽ ഉറച്ച് അടൂർ പ്രകാശ്
പത്തനംതിട്ട: മുഖ്യമന്ത്രി വി.ഡി. സതീശനെതിരെ ഉന്നയിച്ച വിമർശനങ്ങളിൽ ഉറച്ചുനിൽക്കുന്നതായി യുഡിഎഫ് കൺവീനറും കോൺഗ്രസ് നേതാവുമായ അടൂർ പ്രകാശ്. മുന്നണിയിലെ പ്രധാന തീരുമാനങ്ങൾ കൺവീനറായ തന്നെ അറിയിക്കാതെയാണ് കൈക്കൊള്ളുന്നതെന്നായിരുന്നു അദ്ദേഹത്തിന്റെ പ്രധാന പരാതി. വിഷയത്തിൽ അടുത്ത ദിവസങ്ങളിൽ കൂടുതൽ പ്രതികരണങ്ങൾ ഉണ്ടാകുമെന്നും അദ്ദേഹം സൂചിപ്പിച്ചു.
മുഖ്യമന്ത്രിയുടെ തീരുമാനങ്ങളോട് തനിക്ക് എതിർപ്പില്ലെന്നും, തീരുമാനങ്ങൾ എടുക്കുന്ന രീതിയിലും മുന്നണി ചർച്ചകളുടെ അഭാവത്തിലുമാണ് തന്റെ വിയോജിപ്പെന്നും അടൂർ പ്രകാശ് വ്യക്തമാക്കി. യുഡിഎഫ് അധികാരത്തിലെത്തിയതിന് ശേഷം മുന്നണി യോഗം ഒരിക്കൽ മാത്രമാണ് ചേർന്നതെന്നും അദ്ദേഹം പറഞ്ഞു. വിവിധ വിഷയങ്ങൾ കൂട്ടായ ചർച്ചയിലൂടെ തീരുമാനിക്കേണ്ടതുണ്ടെന്നും അദ്ദേഹം വ്യക്തമാക്കി.
സർക്കാർ നിയമനങ്ങളുമായി ബന്ധപ്പെട്ട് കൺവീനർ എന്ന നിലയിൽ തന്നെ കാര്യങ്ങൾ അറിയിക്കേണ്ടതായിരുന്നുവെന്നാണ് അടൂർ പ്രകാശിന്റെ നിലപാട്. മുസ്ലിം ലീഗ് നേതാവ് എം.കെ. മുനീറിനെ ഭരണപരിഷ്കാര കമ്മിഷൻ അധ്യക്ഷനായി നിയമിച്ചതും ഫോർവേഡ് ബ്ലോക്ക് നേതാവ് ജി. ദേവരാജനെ ഡൽഹിയിലെ കേരളത്തിന്റെ പ്രത്യേക പ്രതിനിധിയായി നിയമിച്ചതും സംബന്ധിച്ചും മുന്നണിയിൽ ചർച്ച വേണമായിരുന്നുവെന്ന് അദ്ദേഹം പറഞ്ഞു.
തന്റെ പ്രതികരണത്തിന് പിന്നിൽ ആരുടെയും പിന്തുണ തേടിയിട്ടില്ലെന്നും സ്വന്തം അനുഭവത്തിന്റെ അടിസ്ഥാനത്തിലാണ് കാര്യങ്ങൾ പറഞ്ഞതെന്നും അടൂർ പ്രകാശ് വ്യക്തമാക്കി. “ഇപ്പോൾ ഞാൻ ഒറ്റയ്ക്കാണ്” എന്നായിരുന്നു പിന്തുണ സംബന്ധിച്ച ചോദ്യത്തിന് അദ്ദേഹത്തിന്റെ മറുപടി. ഭാവിയിൽ ഉയരുന്ന വിമർശനങ്ങൾക്ക് അതത് സമയത്ത് മറുപടി നൽകുമെന്നും അദ്ദേഹം പറഞ്ഞു.
വിഷയം എഐസിസിയുടെ ശ്രദ്ധയിൽപ്പെടുത്തുമെന്നും അടൂർ പ്രകാശ് അറിയിച്ചു. എഐസിസിയാണ് തന്നെ യുഡിഎഫ് കൺവീനറായി നിയമിച്ചതെന്നും അതിനാൽ പാർട്ടി കേന്ദ്ര നേതൃത്വത്തെ കാര്യങ്ങൾ അറിയിക്കേണ്ടത് തന്റെ ഉത്തരവാദിത്വമാണെന്നും അദ്ദേഹം വ്യക്തമാക്കി. അതേസമയം, കോൺഗ്രസിലോ യുഡിഎഫിലോ ഏതെങ്കിലും തരത്തിലുള്ള ഭിന്നതയുണ്ടെന്ന പ്രചാരണത്തെ അദ്ദേഹം തള്ളിക്കളഞ്ഞു.
