'ദൈവ'ത്തിന് പകരം വിവിധ പേരുകളിൽ സത്യപ്രതിജ്ഞ

കൊച്ചി: തിരുവനന്തപുരം കോർപ്പറേഷനിലെ 20 ബിജെപി കൗൺസിലർമാർ വിവിധ പേരുകളിൽ നടത്തിയ സത്യപ്രതിജ്ഞ അസാധുവാണെന്ന് കേരള ഹൈക്കോടതി വിധിച്ചു. നിയമം അനുശാസിക്കുന്ന രീതിയിൽ വീണ്ടും സത്യപ്രതിജ്ഞ ചെയ്യാൻ കോടതി നാലാഴ്ചത്തെ സമയം അനുവദിച്ചു. 

കോർപ്പറേഷൻ തിരഞ്ഞെടുപ്പിൽ വിജയിച്ച കൗൺസിലർമാർ 'ഭാരതമാതാവിന്റെ പേരിൽ', 'സംഘടനയുടെ രക്തസാക്ഷികളുടെ പേരിൽ', 'ഗുരുദേവന്റെ പേരിൽ' തുടങ്ങിയ രീതികളിലായിരുന്നു സത്യപ്രതിജ്ഞ ചെയ്തത്. പാലക്കാട് വടക്കഞ്ചേരി ഗ്രാമപഞ്ചായത്ത് അംഗം ഒരാൾ മുൻ മുഖ്യമന്ത്രി ഉമ്മൻ ചാണ്ടിയുടെ പേരിലും സത്യപ്രതിജ്ഞ ചെയ്തിരുന്നു. ഇതും കോടതി അസാധുവാക്കി. 

നിയമപ്രകാരം തെരഞ്ഞെടുക്കപ്പെട്ട ജനപ്രതിനിധികൾക്ക് 'ദൈവത്തിന്റെ പേരിൽ' അല്ലെങ്കിൽ 'ഗൗരവപൂർവം പ്രതിജ്ഞ ചെയ്യുന്നു' എന്ന രീതിയിൽ മാത്രമേ സത്യപ്രതിജ്ഞ ചെയ്യാൻ കഴിയൂവെന്ന് കോടതി വ്യക്തമാക്കി. അതിൽ അധികമായി പേരുകളോ വിശേഷണങ്ങളോ ചേർക്കുന്നത് നിയമപരമായി അനുവദനീയമല്ലെന്നും കോടതി നിരീക്ഷിച്ചു. 

ഈ വിഷയത്തിൽ സിപിഎം കൗൺസിലർ എസ്. പി. ദീപക് സമർപ്പിച്ച ഹർജിയിലാണ് കോടതി വിധി പുറപ്പെടുവിച്ചത്. കേരള മുനിസിപ്പാലിറ്റി ആക്ടിലെ വ്യവസ്ഥകൾ ലംഘിച്ചാണ് സത്യപ്രതിജ്ഞ നടത്തിയതെന്നാണ് ഹർജിയിൽ ചൂണ്ടിക്കാട്ടിയത്. 

സത്യപ്രതിജ്ഞ അസാധുവാണെന്ന് പ്രഖ്യാപിച്ചെങ്കിലും കൗൺസിലർമാർക്ക് നാലാഴ്ചയ്ക്കുള്ളിൽ നിയമാനുസൃതമായി വീണ്ടും സത്യപ്രതിജ്ഞ ചെയ്ത് സ്ഥാനത്ത് തുടരാമെന്ന് കോടതി ഉത്തരവിട്ടു. ഇതിൽ തിരുവനന്തപുരം കോർപ്പറേഷന്റെ ഡെപ്യൂട്ടി മേയറും ഉൾപ്പെടുന്നു.