ടാറ്റ മാത്രമല്ല; ₹10,000 കോടി 'മിഷൻ സമുദ്ര' നിക്ഷേപം സംബന്ധിച്ച് കേരള സർക്കാർ വിശദീകരണം

കേരളത്തിലെ 'മിഷൻ സമുദ്ര' പദ്ധതിയുടെ ഭാഗമായി ₹10,000 കോടി നിക്ഷേപം ടാറ്റ ഗ്രൂപ്പ് മാത്രത്തിൽ നിന്നായിരിക്കുമെന്ന തരത്തിൽ പ്രചരിച്ച വാർത്തകൾക്കിടെ സർക്കാർ വിശദീകരണവുമായി രംഗത്തെത്തി. ₹10,000 കോടി എന്നത് ഒരൊറ്റ കമ്പനിയുടെ നിക്ഷേപമല്ലെന്നും, വിവിധ പദ്ധതികളിലൂടെയും വിവിധ നിക്ഷേപകരിലൂടെയും വരും വർഷങ്ങളിൽ സമാഹരിക്കാനുദ്ദേശിക്കുന്ന ആകെ നിക്ഷേപമാണിതെന്നും സർക്കാർ വ്യക്തമാക്കി. 

സർക്കാരിന്റെ 'മിഷൻ സമുദ്ര' പദ്ധതിയുടെ ലക്ഷ്യം കേരളത്തെ സമഗ്രമായ സമുദ്ര-വ്യവസായ കേന്ദ്രമാക്കി മാറ്റുകയാണ്. കപ്പൽനിർമാണം, കപ്പൽ അറ്റകുറ്റപ്പണി, ഓഫ്‌ഷോർ ഫാബ്രിക്കേഷൻ, മറൈൻ എൻജിനീയറിങ്, ലോജിസ്റ്റിക്സ്, തീരദേശ വ്യവസായങ്ങൾ തുടങ്ങി നിരവധി മേഖലകളെ ഒരുമിച്ച് വികസിപ്പിക്കാനാണ് പദ്ധതി ലക്ഷ്യമിടുന്നത്. 

അതേസമയം, കൊച്ചിൻ പോർട്ടിൽ മാലബാർ സിമന്റ്സും ടാറ്റ പ്രോജക്ട്സിന്റെ അനുബന്ധ സ്ഥാപനമായ ആർട്‌സൺ എൻജിനിയറിങ് ലിമിറ്റഡും ചേർന്ന് സംയുക്ത സംരംഭമായി ഒരു കപ്പൽനിർമാണ യൂണിറ്റിന്റെ പ്രാഥമിക പ്രവർത്തനങ്ങൾ പുരോഗമിക്കുകയാണെന്നും സർക്കാർ അറിയിച്ചു. ഇതിന് ആവശ്യമായ പ്രധാന അനുമതികളും ഭൂമിയും ലഭിച്ചതായും വ്യക്തമാക്കി. 

വിവിധ ദേശീയ-അന്തർദേശീയ നിക്ഷേപകരുമായി ചർച്ചകൾ തുടരുകയാണെന്നും, ഓരോ നിക്ഷേപ നിർദേശവും അന്തിമഘട്ടത്തിലെത്തുമ്പോൾ ഔദ്യോഗിക പ്രഖ്യാപനങ്ങൾ നടത്തുമെന്നും സർക്കാർ അറിയിച്ചു.