ജന്തർ മന്തർ പരാമർശം: ടി.ജി. മോഹൻദാസിനെ വഞ്ചിയൂർ കോടതിയിൽ ഹാജരാക്കി; എസ്എഫ്ഐ പ്രതിഷേധം
ജന്തർ മന്തറിലെ വിദ്യാർഥി പ്രതിഷേധവുമായി ബന്ധപ്പെട്ട വിവാദ പരാമർശങ്ങളിൽ അറസ്റ്റിലായ ആർഎസ്എസ് അനുഭാവി ടി.ജി. മോഹൻദാസിനെ വഞ്ചിയൂർ കോടതിയിൽ ഹാജരാക്കി. തിരുവനന്തപുരം സൈബർ പൊലീസ് രജിസ്റ്റർ ചെയ്ത കേസിലാണ് നടപടി.
വിദ്യാർഥി പ്രതിഷേധത്തെ നേരിടാൻ അധികാരമുണ്ടായിരുന്നെങ്കിൽ പ്രതിഷേധക്കാർക്ക് നേരെ വെടിവെക്കാൻ ഉത്തരവിടുമെന്ന തരത്തിൽ മോഹൻദാസ് നടത്തിയ പരാമർശങ്ങളാണ് വിവാദമായത്. സ്ത്രീകളെക്കുറിച്ചും അപകീർത്തികരമായ പരാമർശങ്ങൾ നടത്തിയെന്ന ആരോപണം ഉയർന്നിരുന്നു. സംഭവത്തിൽ വിവിധ സംഘടനകൾ പൊലീസിൽ പരാതി നൽകിയിരുന്നു.
സംഭവത്തിൽ എസ്എഫ്ഐ പ്രതിഷേധവുമായി രംഗത്തെത്തി. മോഹൻദാസിനെതിരെ ശക്തമായ നിയമനടപടി സ്വീകരിക്കണമെന്നാവശ്യപ്പെട്ടാണ് പ്രതിഷേധം. അതേസമയം, മോഹൻദാസിന്റെ പരാമർശങ്ങൾ വ്യക്തിപരമായ അഭിപ്രായങ്ങളാണെന്നും അദ്ദേഹം ആർഎസ്എസിന്റെ ഔദ്യോഗിക ഭാരവാഹിയല്ലെന്നും ആർഎസ്എസ് വ്യക്തമാക്കിയിരുന്നു. പരാമർശങ്ങളെ സംഘടന ശക്തമായി അപലപിക്കുകയും ചെയ്തു.
മോഹൻദാസിന്റെ ഇലക്ട്രോണിക് ഉപകരണങ്ങൾ പൊലീസ് പിടിച്ചെടുത്തിട്ടുണ്ടെന്നും അവ ഫൊറൻസിക് പരിശോധനയ്ക്ക് വിധേയമാക്കുമെന്നും റിപ്പോർട്ടുണ്ട്. അന്വേഷണത്തിന്റെ ഭാഗമായി കൂടുതൽ വകുപ്പുകൾ ചുമത്തുന്നതും പൊലീസ് പരിശോധിക്കുന്നുണ്ട്.
