ജയിലിൽ നിന്ന് ചരിത്രത്തിൽ ബിരുദം നേടാൻ ഒരുങ്ങി കൂടത്തായി കേസിലെ മുഖ്യപ്രതി ജോളി ജോസഫ്

കോഴിക്കോട്: ഏറെ കോളിളക്കം സൃഷ്ടിച്ച കൂടത്തായി സയനൈഡ് കൊലപാതക പരമ്പരയിലെ മുഖ്യപ്രതിയായ ജോളി ജോസഫ് ജയിലിൽ കഴിയുന്നതിനിടെ ബിഎ ചരിത്ര ബിരുദ പഠനം തുടരുന്നു. ഇന്ദിരാ ഗാന്ധി നാഷണൽ ഓപ്പൺ യൂണിവേഴ്സിറ്റിയുടെ (IGNOU) രണ്ടാം വർഷ പരീക്ഷ എഴുതുന്നതിനായി ജോളിയെ കോഴിക്കോട് സബ് ജയിലിൽ നിന്ന് കണ്ണൂർ വനിതാ ജയിലിലേക്ക് പ്രത്യേക സുരക്ഷയിൽ മാറ്റി. 

എട്ട് പേപ്പറുകളുള്ള പരീക്ഷയിൽ ആറെണ്ണം പൂർത്തിയായിട്ടുണ്ട്. പരീക്ഷ അവസാനിക്കുന്നതുവരെ ജോളി കണ്ണൂർ വനിതാ ജയിലിൽ തുടരും. നേരത്തെ പ്രീഡിഗ്രി വിദ്യാഭ്യാസം മാത്രമായിരുന്നു ജോളിയുടെ യോഗ്യത. 

ജോളിയെ കൂടാതെ മറ്റൊരു തടവുകാരനും ബിഎ ചരിത്ര പരീക്ഷ എഴുതുന്നുണ്ട്. സാക്ഷരതാ മിഷന്റെ തുല്യതാ പരീക്ഷയും ഇതോടൊപ്പം നടക്കുന്നുണ്ട്. വിദ്യാഭ്യാസത്തിലൂടെ തടവുകാർക്ക് പുനരധിവാസത്തിനും സമൂഹത്തിലേക്ക് മടങ്ങിവരുന്നതിനുമുള്ള അവസരമൊരുക്കുകയെന്ന ലക്ഷ്യത്തോടെയാണ് ജയിലുകളിൽ ഇത്തരം പഠന-പരീക്ഷാ സംവിധാനങ്ങൾ നടപ്പാക്കുന്നത്.