സൗജന്യ യാത്രാ പദ്ധതി വിപുലീകരിച്ച് കൊച്ചി കോർപ്പറേഷൻ

തിരുവനന്തപുരം: സംസ്ഥാന സർക്കാർ കെ.എസ്.ആർ.ടി.സി ബസുകളിൽ സ്ത്രീകൾക്കായി നടപ്പാക്കിയ സൗജന്യ യാത്രാ പദ്ധതിയുടെ മാതൃകയിൽ, കൊച്ചി കോർപ്പറേഷനും പുതിയ തീരുമാനം കൈക്കൊണ്ടു. ഫോർട്ട് കൊച്ചി–വൈപ്പിൻ റൂട്ടിൽ സർവീസ് നടത്തുന്ന റോ-റോ ഫെറികളിൽ സ്ത്രീകൾക്ക് സൗജന്യ യാത്ര അനുവദിക്കുന്ന പ്രമേയത്തിന് കോർപ്പറേഷൻ കൗൺസിൽ അംഗീകാരം നൽകി. 

കോർപ്പറേഷൻ കൗൺസിൽ യോഗത്തിൽ നികുതി അപ്പീൽ കമ്മിറ്റി ചെയർമാനും കരിപ്പാലം കൗൺസിലറുമായ കെ.എ. മനാഫ് അവതരിപ്പിച്ച പ്രമേയമാണ് പാസാക്കിയത്. ഗാർഹിക തൊഴിലാളികൾ ഉൾപ്പെടെ ദിവസേന യാത്ര ചെയ്യുന്ന സാധാരണക്കാരായ സ്ത്രീകൾക്ക് ഈ പദ്ധതി വലിയ ആശ്വാസമാകുമെന്നാണ് കോർപ്പറേഷന്റെ വിലയിരുത്തൽ. 

മേയർ വി.കെ. മിനിമോൾ അറിയിച്ചതനുസരിച്ച്, വാഹനമില്ലാതെ യാത്ര ചെയ്യുന്ന സ്ത്രീകൾക്കാണ് സൗജന്യ യാത്രാ ആനുകൂല്യം ലഭിക്കുക. ഓരോ സർവീസിലുമുള്ള 50 യാത്രക്കാരുടെ സീറ്റുകളിൽ അർഹരായ സ്ത്രീകൾക്ക് സൗജന്യ ടിക്കറ്റുകൾ നൽകുന്ന രീതിയിലാണ് പദ്ധതി നടപ്പാക്കാൻ ആലോചിക്കുന്നത്. ഇതിനായുള്ള നടപടിക്രമങ്ങൾ ഉടൻ അന്തിമമാക്കും. 

അതേസമയം, പദ്ധതിയുടെ സാമ്പത്തിക പ്രത്യാഘാതങ്ങൾ വിശദമായി പഠിക്കണമെന്ന് പ്രതിപക്ഷ കൗൺസിലർമാർ ആവശ്യപ്പെട്ടു. കോർപ്പറേഷന് അധിക സാമ്പത്തിക ബാധ്യത ഉണ്ടാകാതെയും യഥാർഥ ഗുണഭോക്താക്കളെ കൃത്യമായി കണ്ടെത്തിയും പദ്ധതി നടപ്പാക്കണമെന്ന് അവർ അഭിപ്രായപ്പെട്ടു. 

18 കോടി രൂപ ചെലവിൽ നിർമ്മിച്ച മൂന്നാമത്തെ റോ-റോ ഫെറിയും ഉടൻ സർവീസിന് എത്തുമെന്നതിനാൽ, പുതിയ സൗജന്യ യാത്രാ പദ്ധതി കൂടുതൽ സ്ത്രീകൾക്ക് പ്രയോജനകരമാകുമെന്നാണ് പ്രതീക്ഷ.