കനത്ത മഴയ്ക്കിടെ തുറന്ന മാൻഹോളിൽ വീണ് മരണം; മുംബൈയിൽ ദാരുണ അപകടം
മുംബൈയിൽ കനത്ത മഴയ്ക്കിടെ വെള്ളക്കെട്ടിനടിയിൽ മറഞ്ഞുകിടന്ന തുറന്ന മാൻഹോളിൽ വീണ് ഒരാൾ മരിച്ചു. സാക്കിനാക്കയിലെ ഖൈറാനി റോഡ് പ്രദേശത്താണ് ദാരുണ അപകടമുണ്ടായത്.
കനത്ത മഴയെ തുടർന്ന് റോഡിൽ രൂപപ്പെട്ട വെള്ളക്കെട്ടിൽ മാൻഹോൾ കാണാൻ കഴിയാതിരുന്നതാണ് അപകടത്തിന് കാരണമായത്. മാൻഹോളിൽ വീണയാളെ അഗ്നിരക്ഷാസേനയും ദുരന്തനിവാരണ സംഘവും ചേർന്ന് നടത്തിയ തിരച്ചിലിനൊടുവിൽ കണ്ടെത്തിയെങ്കിലും ജീവൻ രക്ഷിക്കാനായില്ല.
സംഭവം വലിയ പ്രതിഷേധത്തിന് ഇടയാക്കിയതോടെ തുറന്ന മാൻഹോൾ സുരക്ഷിതമാക്കുന്നതിൽ വീഴ്ചവരുത്തിയതുമായി ബന്ധപ്പെട്ട് അന്വേഷണം ആരംഭിച്ചു. സംഭവത്തിൽ നാല് മുനിസിപ്പൽ ഉദ്യോഗസ്ഥരെ സസ്പെൻഡ് ചെയ്തതായി അധികൃതർ അറിയിച്ചു.
മഹാരാഷ്ട്ര നിയമസഭാ സ്പീക്കർ സംഭവത്തെ അതീവ ഗൗരവമുള്ളതായി വിശേഷിപ്പിക്കുകയും ഉത്തരവാദികൾക്കെതിരെ കർശന നടപടി സ്വീകരിക്കണമെന്ന് ആവശ്യപ്പെടുകയും ചെയ്തു. കരാറുകാരനെതിരെ ക്രിമിനൽ കേസ് രജിസ്റ്റർ ചെയ്യുമെന്നും അധികൃതർ അറിയിച്ചു.
അതേസമയം, കനത്ത മഴയെ തുടർന്ന് മുംബൈയിലെ വിവിധ ഭാഗങ്ങളിൽ രൂക്ഷമായ വെള്ളക്കെട്ടും ഗതാഗതക്കുരുക്കും ട്രെയിൻ സർവീസുകളിലെ തടസ്സങ്ങളും റിപ്പോർട്ട് ചെയ്തിട്ടുണ്ട്. കാലാവസ്ഥാ വകുപ്പ് ശക്തമായ മഴ തുടരുമെന്ന് മുന്നറിയിപ്പ് നൽകിയിട്ടുണ്ട്.
