കേരളത്തിലെ 7 റെയിൽവേ സ്റ്റേഷനുകളിൽ വൻ ഭക്ഷ്യ നവീകരണം

കേരളത്തിലെ ഏഴ് പ്രധാന റെയിൽവേ സ്റ്റേഷനുകളിൽ യാത്രക്കാർക്കായി ആധുനിക ഭക്ഷണസൗകര്യങ്ങൾ ഒരുക്കാൻ ഇന്ത്യൻ റെയിൽവേ ഒരുങ്ങുന്നു. KFC, Wow! Momo പോലുള്ള പ്രമുഖ ഫുഡ് ബ്രാൻഡുകളുടെ ഔട്ട്‌ലെറ്റുകൾ, റെയിൽ കോച്ച് റെസ്റ്റോറന്റുകൾ, ഫുഡ് സ്ട്രീറ്റുകൾ എന്നിവയാണ് പദ്ധതിയുടെ ഭാഗമാകുന്നത്. യാത്രാനുഭവം വിമാനത്താവളങ്ങളിലെ നിലവാരത്തിലേക്ക് ഉയർത്തുകയെന്ന ലക്ഷ്യത്തോടെയാണ് പുതിയ പദ്ധതി നടപ്പാക്കുന്നത്. 

പദ്ധതിയുടെ ഭാഗമായി തിരുവനന്തപുരം സെൻട്രൽ, കൊല്ലം ജംഗ്ഷൻ, എറണാകുളം ജംഗ്ഷൻ, തൃശൂർ, ഷൊർണൂർ ജംഗ്ഷൻ, കോഴിക്കോട്, കണ്ണൂർ എന്നീ ഏഴ് പ്രധാന റെയിൽവേ സ്റ്റേഷനുകളെയാണ് തിരഞ്ഞെടുത്തിരിക്കുന്നത്. ഇവിടെ ബ്രാൻഡഡ് ഫുഡ് ഔട്ട്‌ലെറ്റുകൾ, പ്രാദേശിക ഭക്ഷണവിഭവങ്ങൾ ലഭ്യമാക്കുന്ന ഫുഡ് സ്ട്രീറ്റുകൾ, പഴയ റെയിൽ ബോഗികളെ നവീകരിച്ച് ഒരുക്കുന്ന റെയിൽ കോച്ച് റെസ്റ്റോറന്റുകൾ എന്നിവ സ്ഥാപിക്കും. 

റെയിൽവേ സ്റ്റേഷനുകളിലെ ഭക്ഷണസേവനം കൂടുതൽ ഗുണമേന്മയുള്ളതും ശുചിത്വ നിലവാരം ഉറപ്പാക്കുന്നതുമായ രീതിയിൽ നവീകരിക്കുകയാണ് ലക്ഷ്യം. ദേശീയ-അന്തർദേശീയ ഭക്ഷ്യ ബ്രാൻഡുകൾക്ക് അഞ്ച് വർഷത്തെ ലൈസൻസിന്റെ അടിസ്ഥാനത്തിൽ ഇ-ലേലത്തിലൂടെയാണ് സ്റ്റേഷനുകളിൽ ഇടം അനുവദിക്കുക. യാത്രക്കാർക്ക് കൂടുതൽ വൈവിധ്യമാർന്ന ഭക്ഷണ ഓപ്ഷനുകൾ ലഭ്യമാകുമെന്നാണ് റെയിൽവേയുടെ പ്രതീക്ഷ. 

അതേസമയം, പ്രാദേശിക രുചികൾക്കും മുൻഗണന നൽകുമെന്ന് അധികൃതർ അറിയിച്ചു. കേരളത്തിന്റെ തനത് ഭക്ഷണവിഭവങ്ങൾ ഫുഡ് സ്ട്രീറ്റുകളിലൂടെ ലഭ്യമാക്കുന്നതിനൊപ്പം, കുടുംബങ്ങൾക്കും വിനോദസഞ്ചാരികൾക്കും ആകർഷകമാകുന്ന രീതിയിലാണ് റെയിൽ കോച്ച് റെസ്റ്റോറന്റുകൾ സജ്ജമാക്കുക. 

റെയിൽവേ സ്റ്റേഷനുകളെ വെറും യാത്രാകേന്ദ്രങ്ങൾ മാത്രമല്ല, മികച്ച ഭക്ഷണവും വിശ്രമസൗകര്യങ്ങളും ലഭ്യമാകുന്ന ആധുനിക പൊതുഇടങ്ങളാക്കി മാറ്റുന്നതിനുള്ള കേന്ദ്ര സർക്കാരിന്റെ പദ്ധതിയുടെ ഭാഗമായാണ് ഈ വികസന പ്രവർത്തനങ്ങൾ നടപ്പാക്കുന്നത്.