കൊച്ചിയിൽ തോക്കുചൂണ്ടി വൻ കവർച്ച; കോർപ്പറേറ്റ് ഓഫീസിൽ നിന്ന് മുഖംമൂടി ധരിച്ച സംഘം 80 ലക്ഷം രൂപ കവർന്നു

കൊച്ചി: നഗരത്തിലെ ഒരു കമ്പനിയിൽ അഞ്ചംഗ സംഘം തോക്കുചൂണ്ടി കൊള്ളയടിച്ച കേസിൽ ഒരാൾ അറസ്റ്റിലായി. കൊച്ചി കുണ്ടന്നൂരിലെ നാഷണൽ സ്റ്റീൽ സെയിൽസ് സെന്ററിന്റെ കോർപ്പറേറ്റ് ഓഫീസിൽ കമ്പനി ജീവനക്കാരെ തോക്കുചൂണ്ടി ഭീഷണിപ്പെടുത്തി 80 ലക്ഷം രൂപയുടെ വൻ കവർച്ച നടത്തി.

മുഖംമൂടി ധരിച്ചാണ് കവർച്ചക്കാർ എത്തിയത്. അഞ്ചംഗ സംഘത്തിലെ ഒരാളെന്ന് കരുതുന്ന ഒരാളെ മരട് പോലീസ് കസ്റ്റഡിയിലെടുത്തതായി റിപ്പോർട്ട്. വടുതല സ്വദേശിയായ സജിയെ അറസ്റ്റ് ചെയ്തു. എസിപിയുടെ നേതൃത്വത്തിൽ ഇയാളെ ചോദ്യം ചെയ്തുവരികയാണ്.

പണം ഇരട്ടിപ്പിക്കുന്ന സംഘമാണ് കവർച്ച നടത്തിയതെന്ന് കരുതുന്നു. 80 ലക്ഷം രൂപ നൽകിയാൽ ഇരട്ടി പണം തിരികെ നൽകാമെന്ന് വാഗ്ദാനം ചെയ്ത് സ്റ്റീൽ വിൽപ്പന കേന്ദ്രത്തിന്റെ ഉടമ സുബിനെ ഒരു സംഘം സമീപിച്ചിരുന്നു. പോലീസ് കസ്റ്റഡിയിലുള്ള സജി ഇതിൽ ഇടനിലക്കാരനായി പ്രവർത്തിച്ചു. പണം ഇരട്ടിപ്പിക്കുന്നതുമായി ബന്ധപ്പെട്ട് സംഘവും സുബിനും തമ്മിൽ തർക്കമുണ്ടായിരുന്നു. അതുകൊണ്ടാണ് പട്ടാപ്പകൽ കവർച്ച നടത്താനുള്ള പദ്ധതി തയ്യാറാക്കിയത്.

ആദ്യം ഉച്ചകഴിഞ്ഞ് 3:30 ന് ബൈക്കിൽ രണ്ട് പേർ ഇവിടെ എത്തി. സ്ഥാപനത്തിൽ നിരീക്ഷണം നടത്തി അവർ പോയി. പിന്നീട് അഞ്ച് പേർ ഒരു കാറിൽ എത്തി സ്ഥാപനത്തിന് സമീപം വാഹനം പാർക്ക് ചെയ്ത് അകത്തുകടന്നു. അവരുടെ കൈവശം ഒരു വെട്ടുകത്തിയും തോക്കും ഉണ്ടായിരുന്നു. ആ സമയത്ത് കമ്പനിയിലെ മേശപ്പുറത്ത് പണം എണ്ണിക്കൊണ്ടിരുന്നു. ജീവനക്കാരിൽ നിന്ന് പണം കൈക്കലാക്കി അവർ വന്ന കാറിൽ സംഘം രക്ഷപ്പെട്ടു.

കവർച്ച നടന്ന കമ്പനിക്കുള്ളിൽ സിസിടിവി ക്യാമറകളൊന്നുമില്ല. പ്രദേശത്തെ മറ്റ് സിസിടിവികൾ പരിശോധിച്ചാണ് പ്രതികളെ തിരിച്ചറിഞ്ഞത്. സ്റ്റീൽ മൊത്തവ്യാപാര വിതരണ കമ്പനിയായതിനാൽ സ്റ്റോക്ക് വാങ്ങാൻ സൂക്ഷിച്ചിരുന്ന പണം മോഷ്ടിച്ചതായി ജീവനക്കാർ പറഞ്ഞു. കൊള്ളസംഘം വന്ന കാറിനെക്കുറിച്ച് പോലീസിന് വിവരം ലഭിച്ചു.