മൊബൈൽ സ്വിച്ച് ഓഫ്, കൊച്ചിയിലെ ഇരു വീടുകളിലും ഇല്ല; സിദ്ദിഖ് ഇപ്പോഴും ഒളിവിലാണ്

കൊച്ചി: നടിയെ ആക്രമിച്ച കേസിൽ മുൻകൂർ ജാമ്യാപേക്ഷ ഹൈക്കോടതി തള്ളിയതിനെ തുടർന്ന് ഒളിവിൽ പോയ നടൻ സിദ്ദിഖിനെ കുറിച്ച് വിവരമില്ല. കൊച്ചിയിലെ രണ്ട് വീടുകളിലും ഇയാൾ ഇല്ല. മൊബൈൽ നമ്പറുകളും സ്വിച്ച് ഓഫ് ചെയ്ത നിലയിലാണ്. സിദ്ദിഖ് സുപ്രീം കോടതിയിൽ ഹർജി നൽകാനുള്ള ശ്രമത്തിലാണ്. നിയമ സ്ഥാപനമായ രാമൻ പിള്ള അസോസിയേറ്റ്സിൽ സിദ്ദിഖിൻ്റെ മകൻ സന്ദർശിച്ചതായി റിപ്പോർട്ട്. നാളെ സുപ്രീം കോടതിയിൽ ഹർജി നൽകുമെന്നാണ് അറിയുന്നത്.

ആലുവയിലെ വീട് പൂട്ടിയ നിലയിലാണ്. നടൻ്റെ പടമുഖിലുള്ള വീട് പോലീസ് നിരീക്ഷണത്തിലാണ്. പാലാരിവട്ടത്താണ് അവസാനമായി മൊബൈൽ ഉപയോഗിച്ചതെന്ന് പോലീസിന് വിവരം ലഭിച്ചിട്ടുണ്ട്.

നടൻ വിദേശത്തേക്ക് പോകാനുള്ള സാധ്യത കണക്കിലെടുത്ത് വിമാനത്താവളങ്ങളിൽ പോലീസ് ലുക്ക് ഔട്ട് സർക്കുലർ പുറപ്പെടുവിച്ചിട്ടുണ്ട്. നടൻ്റെ അറസ്റ്റിന് തടസ്സമില്ലെന്ന് പോലീസ് അറിയിച്ചു. ഇയാളെ ഉടൻ അറസ്റ്റ് ചെയ്യാൻ ക്രൈംബ്രാഞ്ച് മേധാവി കൊച്ചി പൊലീസിന് നിർദേശം നൽകി. ഇതേത്തുടർന്നുള്ള അന്വേഷണത്തിലാണ് താരം ഒളിവിൽ പോയതായി വ്യക്തമായത്.

ജസ്റ്റിസ് സിഎസ് ഡയസ് അധ്യക്ഷനായ ഹൈക്കോടതി സിംഗിൾ ബെഞ്ചാണ് സിദ്ദിഖിൻ്റെ മുൻകൂർ ജാമ്യാപേക്ഷ തള്ളിയത്. ലൈംഗികാതിക്രമക്കേസിൽ സിദ്ദിഖിനെ പ്രതിസന്ധിയിലാക്കിയ കൂടുതൽ ശക്തമായ തെളിവുകളും സാക്ഷിമൊഴികളും അന്വേഷണസംഘത്തിന് ലഭിച്ചിരുന്നു. നടിയുടെ ആരോപണങ്ങളും മൊഴികളും ശരിയാണെന്ന് അന്വേഷണ സംഘം കോടതിയെ അറിയിച്ചു.

മുൻകൂർ ജാമ്യാപേക്ഷയിൽ കോടതി നേരത്തെ വാദം കേട്ടിരുന്നെങ്കിലും വിധി പറയുന്നത് മാറ്റിവയ്ക്കുകയായിരുന്നു. പരാതിക്കാരി നേരത്തെ ബലാത്സംഗം ഉന്നയിച്ചിട്ടില്ലെന്നും പരാതി അടിസ്ഥാനരഹിതമാണെന്നും ഹർജിക്കാരന് വേണ്ടി ഹാജരായ മുതിർന്ന അഭിഭാഷകൻ ബി രാമൻ പിള്ള വാദിച്ചു. 2012ലാണ് കേസിന് ആസ്പദമായ സംഭവം നടന്നത്.പരാതിക്കാരി വളരെ സൂക്ഷ്മമായി തയ്യാറാക്കിയ കഥയാണ് പറഞ്ഞതെന്ന് സിദ്ദിഖ് ആരോപിച്ചു.

എന്നാൽ, സിദ്ദിഖ് പല വസ്തുതകളും മറച്ചുവെക്കുകയാണെന്നും ഇരുവരും മസ്‌കോട്ട് ഹോട്ടലിൽ എത്തിയതിന് തെളിവുണ്ടെന്നും സർക്കാരിന് വേണ്ടി ഹാജരായ അഡീഷണൽ പബ്ലിക് പ്രോസിക്യൂട്ടർ പി നാരായണൻ കോടതിയിൽ വാദിച്ചു. പരാതിക്കാരിക്ക് വിശ്വാസ്യതയില്ലെന്നും മറ്റു പലർക്കെതിരെയും ആരോപണങ്ങൾ ഉന്നയിക്കുന്നുവെന്ന സിദ്ദിഖിൻ്റെ പരാമർശത്തിനെതിരെയാണ് കോടതിയുടെ വിമർശനം.