മുഹമ്മദ് ഹനീഷ് ഹൈക്കോടതിയിൽ മാപ്പുപറഞ്ഞു

കൊച്ചി: കേരള സ്റ്റേറ്റ് കാഷ്യു ഡെവലപ്‌മെന്റ് കോർപ്പറേഷൻ (KSCDC) അഴിമതിക്കേസിൽ പ്രോസിക്യൂഷൻ അനുമതി നൽകുന്നതുമായി ബന്ധപ്പെട്ട കോടതിയലക്ഷ്യ ഹർജി പരിഗണിക്കവെ, വ്യവസായ വകുപ്പ് പ്രിൻസിപ്പൽ സെക്രട്ടറി മുഹമ്മദ് ഹനീഷ് കേരള ഹൈക്കോടതിയിൽ നേരിട്ട് ഹാജരായി നിരുപാധികം മാപ്പപേക്ഷ സമർപ്പിച്ചു. 

ഹൈക്കോടതി നിർദേശങ്ങൾ പാലിക്കാത്തതിനെ തുടർന്നാണ് ഹനീഷിനെ നേരിട്ട് ഹാജരാകാൻ കോടതി ആവശ്യപ്പെട്ടിരുന്നത്. ഹാജരാകാതിരുന്നാൽ അറസ്റ്റ് വാറണ്ട് ഉൾപ്പെടെയുള്ള നിർബന്ധനടപടികൾ സ്വീകരിക്കുമെന്ന് കോടതി മുന്നറിയിപ്പ് നൽകിയിരുന്നു. തുടർന്ന് ഹനീഷ് കോടതിയിൽ ഹാജരായി സത്യവാങ്മൂലത്തിലൂടെ മാപ്പപേക്ഷ സമർപ്പിക്കുകയായിരുന്നു. 

കേസിൽ നിലവിൽ കാസ്യൂ വകുപ്പ് ചുമതലയുള്ള ഉദ്യോഗസ്ഥൻ കെ. ബിജു ജൂലൈ 2-നകം പ്രോസിക്യൂഷൻ അനുമതി സംബന്ധിച്ച് തീരുമാനമെടുക്കണമെന്നും ഹൈക്കോടതി നിർദേശിച്ചു. അതിന് ശേഷമാണ് ഹനീഷിന്റെ മാപ്പപേക്ഷയും തുടർനടപടികളും കോടതി പരിഗണിക്കുക. കേസ് ജൂലൈ 2-ലേക്ക് മാറ്റി. 

2015-ൽ രജിസ്റ്റർ ചെയ്ത KSCDC അഴിമതിക്കേസിൽ മുൻ ഉദ്യോഗസ്ഥർക്കെതിരെ കേസെടുക്കാൻ സിബിഐ സംസ്ഥാന സർക്കാരിന്റെ അനുമതി തേടിയിരുന്നു. എന്നാൽ കോടതി നിർദേശങ്ങൾ ഉണ്ടായിട്ടും അനുമതി നൽകാത്തതിനെ തുടർന്നാണ് കോടതിയലക്ഷ്യ ഹർജി സമർപ്പിക്കപ്പെട്ടത്. ഈ വിഷയത്തിലാണ് ഹൈക്കോടതിയുടെ കർശന ഇടപെടൽ.