മുല്ലപ്പെരിയാർ ഡാം സുരക്ഷാ സമിതി: കേരളത്തെ അവഗണിച്ചെന്ന് ആരോപണം

ന്യൂഡൽഹി: മുല്ലപ്പെരിയാർ അണക്കെട്ടിന്റെ സുരക്ഷാ മേൽനോട്ടത്തിനായി രൂപീകരിച്ച സമിതിയിൽ കേരളത്തിന്റെ താൽപര്യങ്ങൾ അവഗണിക്കപ്പെടുകയാണെന്ന് ആരോപിച്ച് ഇടുക്കി എംപി ഡീൻ കുര്യാക്കോസ് കേന്ദ്ര ജലശക്തി മന്ത്രാലയത്തോട് ഇടപെടൽ ആവശ്യപ്പെട്ടു. സമിതിയുടെ നിലവിലെ പ്രവർത്തനരീതിയും അംഗങ്ങളുടെ നിയമനവും പുനഃപരിശോധിക്കണമെന്നാണ് എംപി ആവശ്യപ്പെട്ടത്. 

കേരളത്തിലെ ജനങ്ങളുടെ സുരക്ഷയെ നേരിട്ട് ബാധിക്കുന്ന വിഷയത്തിൽ സംസ്ഥാനത്തിന് മതിയായ പ്രാതിനിധ്യവും അഭിപ്രായം രേഖപ്പെടുത്താനുള്ള അവസരവും ലഭിക്കുന്നില്ലെന്ന് ഡീൻ കുര്യാക്കോസ് ചൂണ്ടിക്കാട്ടി. സുപ്രീംകോടതി നിർദേശപ്രകാരമുള്ള മേൽനോട്ട സംവിധാനത്തിൽ കേരളത്തിന്റെ ആശങ്കകൾക്ക് വേണ്ടത്ര പരിഗണന ലഭിക്കുന്നില്ലെന്നും അദ്ദേഹം ആരോപിച്ചു. 

അണക്കെട്ടിന്റെ സുരക്ഷ സംബന്ധിച്ച തീരുമാനങ്ങളിൽ കേരളത്തെയും തുല്യ പങ്കാളിയാക്കണമെന്നും, സാങ്കേതിക പരിശോധനകളും സുരക്ഷാ വിലയിരുത്തലുകളും കൂടുതൽ സുതാര്യമാക്കണമെന്നും അദ്ദേഹം ആവശ്യപ്പെട്ടു. കേന്ദ്ര സർക്കാർ അടിയന്തരമായി വിഷയത്തിൽ ഇടപെട്ട് കേരളത്തിന്റെ ആശങ്കകൾ പരിഹരിക്കണമെന്നും എംപി കത്തിൽ ആവശ്യപ്പെട്ടിട്ടുണ്ട്. 

1895-ൽ നിർമിച്ച മുല്ലപ്പെരിയാർ അണക്കെട്ടിന്റെ സുരക്ഷയെച്ചൊല്ലി കേരളവും തമിഴ്നാടും തമ്മിലുള്ള തർക്കം വർഷങ്ങളായി തുടരുകയാണ്. അണക്കെട്ട് സുരക്ഷിതമാണെന്നാണ് തമിഴ്നാടിന്റെ നിലപാട്. അതേസമയം, പഴക്കം ചെന്ന അണക്കെട്ടിന് പകരം പുതിയ ഡാം നിർമിക്കണമെന്ന ആവശ്യമാണ് കേരളം ഉയർത്തുന്നത്.