വിവാഹിതയായ യുവതിയെ കാണാൻ പോയതിന് പിന്നാലെ ദുരൂഹമരണം

പത്തനംതിട്ട ചിറ്റാറിൽ 36കാരനായ യുവാവിനെ കുഴിയിൽ മരിച്ച നിലയിൽ കണ്ടെത്തിയ സംഭവത്തിൽ അന്വേഷണം ഊർജിതമാക്കി പൊലീസ്. സംഭവവുമായി ബന്ധപ്പെട്ട് വിവാഹിതയായ യുവതിയുടെ രണ്ട് ബന്ധുക്കളെ പൊലീസ് ചോദ്യം ചെയ്ത് വരികയാണ്. മരണകാരണം വ്യക്തമാകാൻ പോസ്റ്റ്മോർട്ടം റിപ്പോർട്ട് നിർണായകമാകുമെന്ന് അധികൃതർ അറിയിച്ചു. 

കരികയം കോടുമുടി സ്വദേശിയായ സന്ദീപിനെയാണ് ഞായറാഴ്ച രാത്രി സമീപവീട്ടിനടുത്തുള്ള കുഴിയിൽ അബോധാവസ്ഥയിൽ കണ്ടെത്തിയത്. ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല. തുടർന്ന് ചിറ്റാർ പൊലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചു. 

കുടുംബാംഗങ്ങളുടെ മൊഴിപ്രകാരം, സന്ദീപ് ഞായറാഴ്ച വൈകുന്നേരം വിവാഹിതയായ ഒരു യുവതിയെ കാണാനായി വീട്ടിൽ നിന്ന് പോയിരുന്നു. ഇരുവരും തമ്മിൽ ബന്ധമുണ്ടായിരുന്നുവെന്നും യുവതിയെ സ്വന്തം വീട്ടിലേക്ക് കൊണ്ടുവരാൻ സന്ദീപ് ആഗ്രഹിച്ചിരുന്നുവെന്നും പൊലീസ് അറിയിച്ചു. യുവതി അടുത്തിടെ ആത്മഹത്യയ്ക്ക് ശ്രമിച്ചതിനെ തുടർന്ന് ആശുപത്രിയിൽ ചികിത്സയിലായിരുന്നുവെന്നും വിവരമുണ്ട്. 

സന്ദീപിനെ യുവതിയുടെ ബന്ധുക്കൾ മർദിച്ചുവെന്നാണ് കുടുംബത്തിന്റെ ആരോപണം. ഇതിന്റെ അടിസ്ഥാനത്തിലാണ് യുവതിയുടെ രണ്ട് ബന്ധുക്കളെ അന്വേഷണത്തിന്റെ ഭാഗമായി പൊലീസ് ചോദ്യം ചെയ്യുന്നത്. എന്നാൽ മരണകാരണം സംബന്ധിച്ച് പോസ്റ്റ്മോർട്ടം റിപ്പോർട്ട് ലഭിച്ചതിന് ശേഷമേ തുടർനടപടികൾ സ്വീകരിക്കൂവെന്ന് പൊലീസ് വ്യക്തമാക്കി. 

സംഭവം പ്രദേശത്ത് വലിയ ചർച്ചയായിരിക്കുകയാണ്. ദുരൂഹ മരണത്തിന് പിന്നിലെ യഥാർഥ സാഹചര്യങ്ങൾ കണ്ടെത്തുന്നതിനായി എല്ലാ സാധ്യതകളും പരിശോധിച്ചുകൊണ്ടാണ് പൊലീസ് അന്വേഷണം മുന്നോട്ടുകൊണ്ടുപോകുന്നത്.