ഡിസംബർ മുതൽ കേരളത്തിൽ ഡ്രൈവിങ് ലൈസൻസ് പരീക്ഷയിൽ പുതിയ മാറ്റം

ഡ്രൈവിങ് ലൈസൻസ് നേടുന്നതിനുള്ള പരീക്ഷാ രീതിയിൽ വലിയ മാറ്റത്തിന് ഒരുങ്ങുകയാണ് കേരളം. വീഡിയോ ഗെയിം മാതൃകയിലുള്ള പുതിയ പരീക്ഷാ സംവിധാനം ഡിസംബർ മുതൽ സംസ്ഥാനത്ത് നടപ്പാക്കാനാണ് തീരുമാനം. ഇന്ത്യയിൽ ആദ്യമായാണ് ഇത്തരമൊരു സംവിധാനം അവതരിപ്പിക്കുന്നതെന്നാണ് റിപ്പോർട്ട്.

പുതിയ രീതിയിൽ റോഡിലെ യഥാർഥ സാഹചര്യങ്ങളെ അടിസ്ഥാനമാക്കിയുള്ള ദൃശ്യങ്ങളാകും പരീക്ഷയിൽ ഉൾപ്പെടുത്തുക. ഓരോ വീഡിയോയ്ക്കും ഏകദേശം ഒരു മിനിറ്റ് ദൈർഘ്യമുണ്ടാകും. ഡ്രൈവിങ്ങിനിടെ നേരിടാൻ സാധ്യതയുള്ള അപകടസാഹചര്യങ്ങൾ തിരിച്ചറിയാനുള്ള കഴിവാണ് പ്രധാനമായും പരിശോധിക്കുക.

ഒരു പരീക്ഷയിൽ പത്ത് വീഡിയോകളാണ് ഉൾപ്പെടുത്തുക. ഓരോ വീഡിയോയിലും കുറഞ്ഞത് രണ്ട് അപകടസാധ്യതകൾ വീതം ഉണ്ടായിരിക്കും. റോഡിലെ സാഹചര്യങ്ങൾ ശ്രദ്ധിച്ച് അപകടസാധ്യതകൾ കൃത്യമായി തിരിച്ചറിയാൻ കഴിയുന്നുണ്ടോ എന്നതായിരിക്കും പരീക്ഷയുടെ പ്രധാന ലക്ഷ്യം.

ലേണേഴ്‌സ് ലൈസൻസ് ലഭിക്കുന്നവർക്ക് പുതിയ പരീക്ഷയ്ക്ക് തയ്യാറെടുക്കാൻ ഡ്രൈവിങ് സ്‌കൂളുകൾ വഴി പരിശീലനം നൽകാനും പദ്ധതിയുണ്ട്. ലേണേഴ്‌സ് ലൈസൻസ് ലഭിച്ച് 30 ദിവസത്തിനുള്ളിൽ പുതിയ പരീക്ഷ വിജയിക്കണമെന്ന നിർദേശവും മുന്നോട്ടുവച്ചിട്ടുണ്ട്.

പുതിയ സംവിധാനം ഡ്രൈവിങ് പഠിക്കുന്നവരുടെ റോഡ് സുരക്ഷാ ബോധവും അപകടസാധ്യത തിരിച്ചറിയാനുള്ള കഴിവും മെച്ചപ്പെടുത്തുമെന്നാണ് വിലയിരുത്തൽ. സാധാരണ വാഹനമോടിക്കൽ മാത്രമല്ല, യഥാർഥ റോഡ് സാഹചര്യങ്ങളിൽ സുരക്ഷിതമായി തീരുമാനമെടുക്കാനുള്ള കഴിവിനും കൂടുതൽ പ്രാധാന്യം നൽകുന്നതായിരിക്കും പുതിയ പരീക്ഷ.