AI ഭീഷണികൾ നേരിടാൻ കേരള പൊലീസിന് പുതിയ പരിശീലന കേന്ദ്രം
കുറ്റകൃത്യങ്ങളുടെ രീതികൾ മാറുന്നതിനൊപ്പം അവയെ നേരിടുന്ന അന്വേഷണ സംവിധാനങ്ങളും മാറുകയാണ്. ആർട്ടിഫിഷ്യൽ ഇന്റലിജൻസ്, മാൽവെയർ, മറ്റ് സങ്കീർണമായ സൈബർ ഭീഷണികൾ എന്നിവ വർധിക്കുന്ന സാഹചര്യത്തിൽ കേരള പൊലീസ് ഉദ്യോഗസ്ഥർക്ക് പ്രത്യേക പരിശീലനം നൽകാൻ തിരുവനന്തപുരത്ത് പുതിയ സംയോജിത പരിശീലന കേന്ദ്രം ഒരുങ്ങുന്നു. പൊലീസ് ട്രെയിനിങ് കോളേജിലാണ് കേന്ദ്രം സ്ഥാപിക്കാൻ തീരുമാനിച്ചിരിക്കുന്നത്.
ഏകദേശം നാല് മാസത്തിനുള്ളിൽ കേന്ദ്രം പ്രവർത്തനസജ്ജമാക്കാനാണ് ലക്ഷ്യമിടുന്നത്. ആദ്യഘട്ടത്തിൽ സൈബർ സുരക്ഷയും സൈബർ കുറ്റാന്വേഷണവും കേന്ദ്രീകരിച്ചായിരിക്കും പരിശീലനം. യഥാർഥ സംവിധാനങ്ങളെ ബാധിക്കാതെ സൈബർ ആക്രമണങ്ങൾ അനുകരിച്ച് ഉദ്യോഗസ്ഥർക്ക് അവയെ നേരിടാനുള്ള പരിശീലനം നൽകാൻ കഴിയുന്ന പ്രത്യേക സംവിധാനവും ഇവിടെ ഒരുക്കും.
200 ഉദ്യോഗസ്ഥർക്ക് ഒരേസമയം പരിശീലനം നൽകാൻ കഴിയുന്ന സൈബർ റേഞ്ചും പദ്ധതിയുടെ ഭാഗമാണ്. 300-ലധികം വിർച്വൽ മെഷീനുകളും നൂറുകണക്കിന് സൈബർ സാഹചര്യങ്ങളും ഇതിൽ ഉൾപ്പെടും. ആക്രമണങ്ങളെ തിരിച്ചറിയൽ, സംഭവങ്ങളോട് പ്രതികരിക്കൽ, മാൽവെയർ വിശകലനം, ഡിജിറ്റൽ ഫോറൻസിക്സ്, സൈബർ പ്രതിസന്ധി കൈകാര്യം ചെയ്യൽ തുടങ്ങിയ മേഖലകളിലാണ് പരിശീലനം.
AI അടിസ്ഥാനമാക്കിയുള്ള ത്രെറ്റ് അനലിറ്റിക്സ്, ത്രെറ്റ്-ഇന്റലിജൻസ് പ്ലാറ്റ്ഫോം, മാൽവെയർ സാൻഡ്ബോക്സ്, ഡിജിറ്റൽ ഫോറൻസിക്സ് സംവിധാനങ്ങൾ എന്നിവയും കേന്ദ്രത്തിൽ ഉണ്ടാകും. സംശയാസ്പദമായ ഫയലുകളും ഡിജിറ്റൽ തെളിവുകളും സുരക്ഷിതമായ സാഹചര്യത്തിൽ പരിശോധിക്കാനും അന്വേഷണ ഉദ്യോഗസ്ഥർക്ക് ഇതിലൂടെ സാധിക്കും.
നിലവിൽ ആദ്യഘട്ടം പൊലീസ് ഉദ്യോഗസ്ഥർക്കായി മാത്രമാണ്. ഭാവിയിൽ പരിശീലന സംവിധാനത്തിന്റെ ചില ഭാഗങ്ങൾ സാധാരണക്കാർക്കും പ്രയോജനപ്പെടുത്താനുള്ള സാധ്യതയുണ്ടെന്ന് അധികൃതർ വ്യക്തമാക്കി. സൈബർ കുറ്റകൃത്യങ്ങൾ കൂടുതൽ സങ്കീർണമാകുന്ന കാലത്ത്, സാങ്കേതിക വിദ്യയെ നേരിടാൻ പൊലീസിന്റെ അന്വേഷണശേഷി ശക്തിപ്പെടുത്താനുള്ള നീക്കമായാണ് പുതിയ കേന്ദ്രം ഒരുങ്ങുന്നത്.
