ഓണം കുശാൽ; ക്ഷേമപെൻഷൻ വിതരണം നാളെ മുതൽ, സർക്കാർ ജീവനക്കാർക്ക് ₹4,500 വരെ ബോണസ്

തിരുവനന്തപുരം: ഓണം പ്രമാണിച്ച് കേരളത്തിലെ സാമൂഹ്യസുരക്ഷാ ക്ഷേമപെൻഷൻ വിതരണം നാളെ മുതൽ ആരംഭിക്കും. സർക്കാർ ജീവനക്കാർക്കും വിവിധ വിഭാഗങ്ങളിലായി ഓണം ബോണസും പ്രത്യേക ഉത്സവബത്തയും അനുവദിച്ചിട്ടുണ്ട്.

സംസ്ഥാന സർക്കാർ ജീവനക്കാർ, എയ്ഡഡ് വിദ്യാഭ്യാസ സ്ഥാപനങ്ങളിലെ ജീവനക്കാർ, തദ്ദേശ സ്വയംഭരണ സ്ഥാപനങ്ങളിലെ ജീവനക്കാർ എന്നിവരിൽ അർഹരായവർക്ക് പരമാവധി ₹4,500 വരെ ബോണസ് ലഭിക്കും. 2026 മാർച്ച് 31ന് 11-ാം ശമ്പള പരിഷ്കരണ സ്കെയിൽ പ്രകാരം HRA ഒഴികെയുള്ള മൊത്തം ശമ്പളം ₹49,275 വരെ ഉള്ളവരാണ് ബോണസിന് അർഹർ. 

ബോണസിന് അർഹതയില്ലാത്ത ജീവനക്കാർക്ക് വിഭാഗമനുസരിച്ച് ₹3,000 മുതൽ ₹1,250 വരെ പ്രത്യേക ഉത്സവബത്ത ലഭിക്കും. സർവീസ് പെൻഷൻകാർ, കുടുംബ പെൻഷൻകാർ തുടങ്ങിയ പെൻഷൻ വിഭാഗങ്ങൾക്ക് ₹1,250 പ്രത്യേക ഉത്സവബത്തയാണ് അനുവദിച്ചിരിക്കുന്നത്. 

ബോണസും പ്രത്യേക ഉത്സവബത്തയും ഓഗസ്റ്റ് 17 മുതൽ വിതരണം ചെയ്യാനാണ് ഉത്തരവ്. ഒരാൾക്ക് ബോണസോ പ്രത്യേക ഉത്സവബത്തയോ—ഇതിൽ ഏതെങ്കിലും ഒരു ആനുകൂല്യം മാത്രമേ ലഭിക്കൂ. 

ഇതിന് പുറമെ സർക്കാർ ജീവനക്കാർക്കും പെൻഷൻകാർക്കും ₹20,000 വരെ ഓണം അഡ്വാൻസും അനുവദിച്ചിട്ടുണ്ട്. ഈ തുക പിന്നീട് അഞ്ച് തുല്യ ഗഡുക്കളായി ശമ്പളത്തിൽ നിന്ന് തിരിച്ചുപിടിക്കും.