കേരളത്തിൽ ഉള്ളിവില കുതിക്കുന്നു; 100 ടൺ ഉള്ളി കിലോയ്ക്ക് ₹35ന് വിൽക്കും

തിരുവനന്തപുരം: കേരളത്തിൽ ഉള്ളിവില ഉയർന്ന സാഹചര്യത്തിൽ ഉപഭോക്താക്കൾക്ക് ആശ്വാസം നൽകാൻ സർക്കാർ ഇടപെടുന്നു. നാഷണൽ കോഓപ്പറേറ്റീവ് കൺസ്യൂമേഴ്സ് ഫെഡറേഷൻ (NCCF) വഴി 100 ടൺ ഉള്ളി സംഭരിച്ച് കിലോയ്ക്ക് ₹35 നിരക്കിൽ വിൽക്കാനാണ് സർക്കാർ തീരുമാനം. 

നിലവിലെ വിപണി വില വർധന നിയന്ത്രിക്കുന്നതിനും സാധാരണക്കാർക്ക് കുറഞ്ഞ വിലയിൽ ഉള്ളി ലഭ്യമാക്കുന്നതിനുമാണ് നടപടി. മഹാരാഷ്ട്രയിലെ നാസിക്കിൽ നിന്ന് ഉള്ളി എത്തിക്കാനാണ് പദ്ധതി.

രാജ്യത്തിന്റെ വിവിധ ഭാഗങ്ങളിൽ വില ഉയർന്നതിനെ തുടർന്ന് കേന്ദ്രസർക്കാരും ബഫർ സ്റ്റോക്കിലുള്ള ഉള്ളി ₹35 കിലോ നിരക്കിൽ വിൽക്കാൻ തുടങ്ങിയിട്ടുണ്ട്. കേരളത്തിലേക്കും എറണാകുളം ഉൾപ്പെടെയുള്ള പ്രധാന ഉപഭോഗ കേന്ദ്രങ്ങളിലേക്കും ഉള്ളി എത്തിക്കുന്ന നടപടികൾ പുരോഗമിക്കുകയാണ്. 

മഴയും വിളനാശവും സീസണൽ ആവശ്യകത വർധിച്ചതുമാണ് രാജ്യത്തെ വിവിധ വിപണികളിൽ ഉള്ളിവില ഉയരാനുള്ള പ്രധാന കാരണങ്ങളായി ചൂണ്ടിക്കാണിക്കുന്നത്. സർക്കാർ ഇടപെടലിലൂടെ വിപണിയിലെ വിലക്കയറ്റം നിയന്ത്രിക്കാനാകുമെന്നാണ് പ്രതീക്ഷ.