നിമിഷ പ്രിയ വിഷയത്തിൽ ഞങ്ങളുടെ ജോലി കഴിഞ്ഞു, ഇനി വേണ്ടത് ചെയ്യേണ്ടത് അവരുടെ ഉത്തരവാദിത്തമാണ്'

കോഴിക്കോട്: നിമിഷ പ്രിയയുടെ മോചനവുമായി ബന്ധപ്പെട്ട വിഷയത്തിൽ കേന്ദ്ര സർക്കാരിനെ മറികടക്കാൻ ആഗ്രഹിക്കുന്നില്ലെന്ന് കാന്തപുരം അബൂബക്കർ മുസ്ലിയാർ പറഞ്ഞു.

യെമൻ ജയിലിൽ കഴിയുന്ന നിമിഷ പ്രിയയുടെ മോചനവുമായി ബന്ധപ്പെട്ട ഇടപെടലുകളെക്കുറിച്ചും ഇതുവരെയുണ്ടായ പുരോഗതിയെക്കുറിച്ചും കേന്ദ്ര സർക്കാരിനെ അറിയിച്ചിട്ടുണ്ടെന്നും അദ്ദേഹം വ്യക്തമാക്കി. സൂഫി പണ്ഡിതരുടെ ഇടപെടലിനെത്തുടർന്ന് കൊല്ലപ്പെട്ട തലാലിന്റെ കുടുംബം പിന്മാറിയതായി കാന്തപുരം നേരത്തെ അറിയിച്ചിരുന്നു.

"നിമിഷ പ്രിയയുടെ വധശിക്ഷ റദ്ദാക്കിയതോടെ ഞങ്ങളുടെ ജോലി കഴിഞ്ഞു. ഇനി ആവശ്യമായ കാര്യങ്ങൾ ചെയ്യേണ്ടത് സർക്കാരിന്റെ ഉത്തരവാദിത്തമാണ്. സർക്കാർ അത് ചെയ്യുമെന്ന് ഞാൻ വിശ്വസിക്കുന്നു. മനുഷ്യത്വം ഉയർത്തിപ്പിടിക്കുക എന്നതാണ് ലക്ഷ്യം. മുസ്ലീമോ ഹിന്ദുവോ ക്രിസ്ത്യാനിയോ ആകട്ടെ മനുഷ്യത്വത്തെ വിലമതിക്കണമെന്ന് ലോകത്തിന് സന്ദേശം നൽകുന്നതിനാണ് ഞാൻ നിമിഷ പ്രിയ വിഷയത്തിൽ ഇടപെട്ടത്," അദ്ദേഹം കൂട്ടിച്ചേർത്തു.

2017-ൽ യെമൻ പൗരനായ തലാൽ അബ്ദു മഹ്ദിയെ കൊലപ്പെടുത്തി മൃതദേഹം കഷണങ്ങളാക്കി വാട്ടർ ടാങ്കിൽ ഒളിപ്പിച്ചു എന്നതാണ് നിമിഷയ്‌ക്കെതിരായ കേസ്. ഈ കേസിൽ വിചാരണ കോടതി നിമിഷയ്ക്ക് വധശിക്ഷ വിധിച്ചു.

കൊല്ലപ്പെട്ട തലാലിന്റെ കുടുംബം രക്തപ്പണം സ്വീകരിച്ച് മാപ്പ് നൽകിയാൽ മാത്രമേ മലയാളി സ്ത്രീയുടെ മോചനം സാധ്യമാകൂ. എന്നാൽ, പണം നൽകരുതെന്നും വധശിക്ഷ നടപ്പാക്കണമെന്നും തലാലിന്റെ സഹോദരനും മറ്റുള്ളവരും ആവശ്യപ്പെട്ടിട്ടുണ്ട്.