കേരള സർവകലാശാലയിൽ ഗവർണർ പങ്കെടുത്ത പരിപാടിയിൽ ഭാരതാംബയുടെ ചിത്രം
തിരുവനന്തപുരം: ഗവർണർ രാജേന്ദ്ര അർലേക്കർ പങ്കെടുത്ത പരിപാടിയിൽ കാവിക്കൊടിയേന്തിയ ഭാരതാംബയുടെ ചിത്രം സ്ഥാപിച്ചതിനെ തുടർന്ന് പ്രതിഷേധം. കേരള സർവകലാശാല സെനറ്റ് ഹാളിൽ സംഘടിപ്പിച്ച സ്വകാര്യ ചടങ്ങിൽ ഭാരതാംബയുടെ ചിത്രം സ്ഥാപിച്ചു. ഇതിനെത്തുടർന്ന് എസ്‌എഫ്‌ഐ, കെഎസ്യു, ഡിവൈഎഫ്‌ഐ പ്രവർത്തകർ പ്രതിഷേധവുമായി രംഗത്തെത്തി.
അടിയന്തരാവസ്ഥയുടെ 50-ാം വാർഷികത്തോടനുബന്ധിച്ച് ശ്രീ പത്മനാഭ സേവാ സമിതി സംഘടിപ്പിച്ച പരിപാടി ഗവർണർ ഉദ്ഘാടനം ചെയ്യാനിരിക്കുകയായിരുന്നു.
ചിത്രം നീക്കം ചെയ്യണമെന്ന് ആവശ്യപ്പെട്ട് എസ്‌എഫ്‌ഐ, ഡിവൈഎഫ്‌ഐ, കെഎസ്യു പ്രവർത്തകർ പ്രതിഷേധിച്ചു. പോലീസ് അവരെ നീക്കം ചെയ്തു. സെനറ്റ് ഹാളിന് പുറത്തും അകത്തും സംഘർഷമുണ്ടായി.
ഹാളിലേക്ക് തള്ളിക്കയറിയ കെഎസ്യു പ്രവർത്തകരെ പുറത്താക്കിയ ശേഷമാണ് പരിപാടി ആരംഭിച്ചത്. കേരള സർവകലാശാല രജിസ്ട്രാർ കെ.എസ്. അനിൽകുമാറും എസ്‌എഫ്‌ഐയും ചിത്രം നീക്കം ചെയ്യണമെന്ന് ആവശ്യപ്പെട്ടിരുന്നു. ചിത്രം നീക്കം ചെയ്യാതെ പരിപാടി നടത്താൻ സമ്മതിക്കില്ല എന്നായിരുന്നു എസ്‌എഫ്‌ഐയുടെ നിലപാട്.
എന്നാൽ ചിത്രം നീക്കം ചെയ്താൽ ഗവർണർ പരിപാടിയിൽ പങ്കെടുക്കില്ലെന്ന് രാജ്ഭവൻ അറിയിച്ചു. ബുധനാഴ്ച വൈകുന്നേരം 5:30 നാണ് പരിപാടി നിശ്ചയിച്ചിരുന്നത്. സംഘർഷ സാധ്യത കണക്കിലെടുത്ത് സ്ഥലത്ത് വലിയ പോലീസ് സന്നാഹം ഏർപ്പെടുത്തി. എസ്‌എഫ്‌ഐ പ്രവർത്തകരും ബിജെപി നേതാക്കളും സ്ഥലത്ത് നിലയുറപ്പിച്ചിരുന്നു.
ഭാരതാംബയുടെ ചിത്രം നീക്കം ചെയ്യില്ലെന്ന് പരിപാടിയുടെ സംഘാടകർ പറഞ്ഞു. പരിപാടി കഴിഞ്ഞ് ഗവർണർ പുറത്തുവരുമ്പോൾ പ്രതിഷേധങ്ങൾ ഉണ്ടാകുമെന്ന് എസ്‌എഫ്‌ഐ സംസ്ഥാന സെക്രട്ടറി സഞ്ജീവ് പറഞ്ഞു.
\
\