എല്ലാ ജില്ലകളിലും അപകടാനന്തര അന്വേഷണ സംഘങ്ങൾ രൂപീകരിക്കും

തിരുവനന്തപുരം: കൊട്ടാരക്കരയിൽ ടിപ്പർ ലോറി നിയന്ത്രണം വിട്ട് ബസ് കാത്തുനിന്നവരിലേക്ക് പാഞ്ഞുകയറി മൂന്ന് പേർ മരിക്കുകയും നിരവധി പേർക്ക് പരിക്കേൽക്കുകയും ചെയ്ത ദാരുണ അപകടത്തിന്റെ പശ്ചാത്തലത്തിൽ സംസ്ഥാന സർക്കാർ എല്ലാ ജില്ലകളിലും പ്രത്യേക അപകടാനന്തര അന്വേഷണ സംഘങ്ങൾ രൂപീകരിക്കാൻ തീരുമാനിച്ചു. ഗതാഗത മന്ത്രാലയത്തിന്റെ നിർദേശം മന്ത്രിസഭ ഉടൻ അംഗീകരിക്കുമെന്നാണ് റിപ്പോർട്ട്. 

‘പോസ്റ്റ്-ക്രാഷ് ഇൻവെസ്റ്റിഗേഷൻ ടീം’ എന്ന പേരിൽ പ്രവർത്തിക്കുന്ന സംഘത്തിൽ ആർ.ടി.ഒ ഉദ്യോഗസ്ഥർ, പൊലീസ് ഇൻസ്പെക്ടർമാർ, പൊതുമരാമത്ത് വകുപ്പ് അല്ലെങ്കിൽ ദേശീയപാത എൻജിനീയർമാർ, നാറ്റ്പാക് വിദഗ്ധർ തുടങ്ങിയവർ അംഗങ്ങളായിരിക്കും. ഓരോ വലിയ അപകടത്തിന്റെയും കാരണം പ്രത്യേകം പരിശോധിച്ച് സമഗ്ര റിപ്പോർട്ട് തയ്യാറാക്കുകയാണ് ലക്ഷ്യം. 

അപകടം സംഭവിച്ചാൽ പൊലീസ് കുറ്റാന്വേഷണം നടത്തുന്നതിനൊപ്പം റോഡിന്റെ രൂപകൽപന, സുരക്ഷാ സംവിധാനങ്ങൾ, വാഹനത്തിന്റെ സാങ്കേതിക തകരാറുകൾ, ഡ്രൈവറുടെ വീഴ്ചകൾ എന്നിവയും വിവിധ വകുപ്പുകൾ പ്രത്യേകം പരിശോധിക്കും. പിന്നീട് ഇവയുടെ കണ്ടെത്തലുകൾ ഏകോപിപ്പിച്ചാകും അന്തിമ റിപ്പോർട്ട് തയ്യാറാക്കുക. 

കഴിഞ്ഞ ദിവസം കൊല്ലം ജില്ലയിലെ കൊട്ടാരക്കരയ്ക്ക് സമീപം മണൽ കയറ്റിയ ടിപ്പർ ലോറി നിയന്ത്രണം വിട്ട് ബസ് സ്റ്റോപ്പിലേക്ക് ഇടിച്ചുകയറിയ അപകടത്തിൽ 15 വയസുകാരൻ ഉൾപ്പെടെ മൂന്ന് പേർ മരിച്ചിരുന്നു. ഈ ദുരന്തമാണ് പുതിയ സംവിധാനത്തിന് പ്രേരണയായത്. 

അപകടങ്ങളുടെ യഥാർഥ കാരണങ്ങൾ ശാസ്ത്രീയമായി കണ്ടെത്തി ഭാവിയിൽ സമാന ദുരന്തങ്ങൾ ഒഴിവാക്കുക, റോഡ് സുരക്ഷ ശക്തിപ്പെടുത്തുക, അപകടസാധ്യതയുള്ള റോഡ് മേഖലകൾ തിരിച്ചറിഞ്ഞ് പരിഹാര നടപടികൾ സ്വീകരിക്കുക എന്നിവയാണ് പുതിയ അന്വേഷണ സംഘങ്ങളുടെ പ്രധാന ലക്ഷ്യമെന്ന് സർക്കാർ വൃത്തങ്ങൾ അറിയിച്ചു.