റേഷൻ വിതരണം ഇനി 24 മണിക്കൂറും; 'അന്നപൂർട്ടി' ഗ്രെയിൻ എടിഎം പരീക്ഷണാടിസ്ഥാനത്തിൽ കേരളത്തിൽ

റേഷൻ വിതരണം കൂടുതൽ സുതാര്യവും വേഗത്തിലുമാക്കാൻ 'അന്നപൂർട്ടി' ഗ്രെയിൻ എടിഎം (Grain ATM) സംവിധാനം പരീക്ഷണാടിസ്ഥാനത്തിൽ നടപ്പാക്കാൻ കേരള സർക്കാർ ഒരുങ്ങുന്നു. ബാങ്ക് എടിഎമ്മിന് സമാനമായി പ്രവർത്തിക്കുന്ന ഈ സംവിധാനം വഴി അർഹരായ റേഷൻ കാർഡ് ഉടമകൾക്ക് 24 മണിക്കൂറും ഭക്ഷ്യധാന്യങ്ങൾ ലഭ്യമാക്കാനാണ് ലക്ഷ്യം. 

ആധാർ അടിസ്ഥാനത്തിലുള്ള ബയോമെട്രിക് പരിശോധന പൂർത്തിയാക്കിയ ശേഷം യന്ത്രം ഗുണഭോക്താവിന് അനുവദിച്ചിരിക്കുന്ന അരിയോ ഗോതമ്പോ കൃത്യമായ അളവിൽ സ്വയം വിതരണം ചെയ്യും. 50 കിലോഗ്രാം വരെ ധാന്യം അഞ്ച് മിനിറ്റിനുള്ളിൽ വിതരണം ചെയ്യാൻ ഈ സംവിധാനത്തിന് കഴിയും. 

നിലവിലെ റേഷൻ കടകളിലെ നീണ്ട ക്യൂ, അളവിലെ പിഴവുകൾ, ധാന്യനഷ്ടം തുടങ്ങിയ പ്രശ്നങ്ങൾ കുറയ്ക്കുന്നതിനൊപ്പം വിതരണത്തിലെ സുതാര്യതയും വർധിപ്പിക്കുമെന്നാണ് വിലയിരുത്തൽ. ലോക ഭക്ഷ്യപരിപാടി (WFP) വികസിപ്പിച്ച ഈ സാങ്കേതികവിദ്യ ഇതിനകം ഒഡീഷ ഉൾപ്പെടെ ചില സംസ്ഥാനങ്ങളിൽ പരീക്ഷണാടിസ്ഥാനത്തിൽ നടപ്പാക്കിയിട്ടുണ്ട്. 

കേരളത്തിലും ആദ്യഘട്ടത്തിൽ തിരഞ്ഞെടുത്ത റേഷൻ കടകളിലായിരിക്കും 'അന്നപൂർട്ടി' ഗ്രെയിൻ എടിഎം സ്ഥാപിക്കുക. പരീക്ഷണ പദ്ധതിയുടെ ഫലം വിലയിരുത്തിയ ശേഷമാകും സംസ്ഥാന വ്യാപകമായി പദ്ധതി വ്യാപിപ്പിക്കുന്ന കാര്യത്തിൽ സർക്കാർ തീരുമാനമെടുക്കുക. 

ഈ സംവിധാനം വിജയകരമായാൽ റേഷൻ വിതരണ രംഗത്ത് വലിയ മാറ്റമുണ്ടാകുമെന്നും ഗുണഭോക്താക്കൾക്ക് ഏത് സമയത്തും സൗകര്യപ്രദമായി ഭക്ഷ്യധാന്യം ലഭ്യമാക്കാൻ കഴിയുമെന്നും അധികൃതർ പ്രതീക്ഷിക്കുന്നു.