സീറ്റിലിരുന്ന് ഷോപ്പിങ്; മംഗളൂരു–ഗോവ വന്ദേ ഭാരതിൽ പുതിയ സേവനം ജൂലൈ 28 മുതൽ

മംഗളൂരു–ഗോവ വന്ദേ ഭാരത് എക്സ്പ്രസിൽ യാത്ര ചെയ്യുന്നവർക്ക് ഇനി സ്വന്തം സീറ്റിലിരുന്ന് തന്നെ ഭക്ഷ്യവസ്തുക്കൾ, പാനീയങ്ങൾ, സ്മരണികകൾ ഉൾപ്പെടെയുള്ള ഉൽപ്പന്നങ്ങൾ വാങ്ങാനാകുന്ന ഓൺബോർഡ് ഷോപ്പിങ് സേവനം ജൂലൈ 28 മുതൽ ആരംഭിക്കും. യാത്രാനുഭവം കൂടുതൽ സൗകര്യപ്രദവും ആധുനികവുമാക്കുക എന്ന ലക്ഷ്യത്തോടെയാണ് ഇന്ത്യൻ റെയിൽവേ പുതിയ സംവിധാനം അവതരിപ്പിക്കുന്നത്. 

യാത്രക്കാർക്ക് സീറ്റിൽ നിന്ന് തന്നെ ഉൽപ്പന്നങ്ങൾ തിരഞ്ഞെടുത്ത് ഓർഡർ ചെയ്യാനും പണമടച്ച് ലഭ്യമാക്കാനും കഴിയുന്ന രീതിയിലാണ് സേവനം ഒരുക്കിയിരിക്കുന്നത്. ട്രെയിനിലെ യാത്രക്കിടെ അധിക സൗകര്യങ്ങൾ ലഭ്യമാക്കുന്നതിനൊപ്പം വിനോദസഞ്ചാരികൾക്കും കുടുംബയാത്രക്കാർക്കും ഇത് കൂടുതൽ പ്രയോജനകരമാകുമെന്നാണ് റെയിൽവേയുടെ വിലയിരുത്തൽ.