അനധികൃത ഫെയർനസ് ക്രീമുകളുടെ വിൽപ്പനയ്ക്കെതിരെ കർശന നടപടി സ്വീകരിക്കും

മുന്നറിയിപ്പുമായി ആരോഗ്യമന്ത്രി കെ. മുരളീധരൻ
 
KM

സംസ്ഥാനത്ത് അംഗീകാരമില്ലാത്ത ഫെയർനസ് ക്രീമുകളുടെ വിൽപ്പന നിയന്ത്രിക്കാൻ കർശന നടപടി സ്വീകരിക്കുമെന്ന് ആരോഗ്യമന്ത്രി കെ. മുരളീധരൻ. ഓൺലൈൻ പ്ലാറ്റ്‌ഫോമുകൾ വഴിയും സമൂഹമാധ്യമങ്ങളിലൂടെയും പ്രചരിപ്പിക്കുന്ന ഇത്തരം ഉൽപ്പന്നങ്ങളുടെ വിൽപ്പന തടയാൻ സർക്കാർ ഇടപെടുമെന്നും അദ്ദേഹം വ്യക്തമാക്കി. അംഗീകാരമില്ലാത്ത ക്രീമുകൾ ഉപയോഗിക്കുന്നതിനെതിരെ പൊതുജനങ്ങൾ ജാഗ്രത പാലിക്കണമെന്നും മന്ത്രി മുന്നറിയിപ്പ് നൽകി.

മലപ്പുറത്ത് 17കാരിക്ക് ഫെയർനസ് ക്രീം ഉപയോഗത്തെ തുടർന്ന് ഗുരുതരമായ വൃക്കരോഗം സ്ഥിരീകരിച്ച സംഭവത്തിന്റെ പശ്ചാത്തലത്തിലാണ് മന്ത്രിയുടെ പ്രതികരണം. സമൂഹമാധ്യമങ്ങളിലെ ഇൻഫ്ലുവൻസർമാരുടെ പരസ്യം കണ്ട് ഓൺലൈനിലൂടെ വാങ്ങിയ ക്രീമാണ് പെൺകുട്ടി ഉപയോഗിച്ചിരുന്നത്. തുടർച്ചയായി ഒരു വർഷത്തോളം ക്രീം ഉപയോഗിച്ചതിന് പിന്നാലെ നടത്തിയ പരിശോധനകളിൽ ശരീരത്തിൽ ഉയർന്ന അളവിൽ മെർക്കുറിയുടെ സാന്നിധ്യം കണ്ടെത്തുകയായിരുന്നു. മെമ്പ്രനസ് നെഫ്രോപ്പതി എന്ന വൃക്കരോഗമാണ് പെൺകുട്ടിക്ക് സ്ഥിരീകരിച്ചത്.

ആശുപത്രിയിൽ നടത്തിയ പരിശോധനയിൽ പെൺകുട്ടി ഉപയോഗിച്ച ക്രീമിൽ 1.25 ശതമാനം മെർക്കുറി കണ്ടെത്തിയതായി റിപ്പോർട്ടുകളുണ്ട്. സൗന്ദര്യവർധക ഉൽപ്പന്നങ്ങളിൽ അനുവദനീയമായ മെർക്കുറിയുടെ പരമാവധി അളവ് ഒരു ദശലക്ഷത്തിൽ ഒരു ഭാഗം (1 പി.പി.എം) മാത്രമാണ്. ഇതിന്റെ പരിധിയേക്കാൾ വളരെ ഉയർന്ന അളവിലുള്ള മെർക്കുറി വൃക്കകളുടെ പ്രവർത്തനത്തെ ഗുരുതരമായി ബാധിക്കുമെന്ന് ആരോഗ്യവിദഗ്ധർ മുന്നറിയിപ്പ് നൽകുന്നു.

സംഭവത്തിൽ സംസ്ഥാന ബാലാവകാശ കമ്മീഷനും സ്വമേധയാ കേസെടുത്തിട്ടുണ്ട്. ആരോഗ്യവകുപ്പ് ഡയറക്ടർ, സംസ്ഥാന പൊലീസ് മേധാവി, ഡ്രഗ്സ് കൺട്രോളർ, കേന്ദ്ര ഉപഭോക്തൃ സംരക്ഷണ അതോറിറ്റി എന്നിവരോട് വിശദീകരണം തേടിയിട്ടുണ്ട്. ഓൺലൈൻ വഴിയുള്ള അനധികൃത സൗന്ദര്യവർധക ഉൽപ്പന്നങ്ങളുടെ വിൽപ്പന തടയുന്നതിനായി പരിശോധനകളും നടപടികളും ശക്തമാക്കാനാണ് സർക്കാർ തീരുമാനം. ഉൽപ്പന്നങ്ങൾ വാങ്ങുന്നതിന് മുൻപ് അവയുടെ നിർമ്മാതാവ്, ലൈസൻസ്, ഘടകങ്ങൾ എന്നിവ പരിശോധിക്കണമെന്നും അധികൃതർ നിർദേശിച്ചു.