ഓപ്പൺ യൂണിവേഴ്സിറ്റി വിസിയുടെ രാജി ഉപാധികളോടെ ഗവർണർ സ്വീകരിച്ചു; വിപി ജഗധിരാജ് വിസിയാകും

തിരുവനന്തപുരം: കേരള ഓപ്പൺ യൂണിവേഴ്സിറ്റി വൈസ് ചാൻസലർ മുബാറക് പാഷയുടെ രാജി ഉപാധികളോടെ ഗവർണർ ആരിഫ് മുഹമ്മദ് ഖാൻ സ്വീകരിച്ചു. ഇയാളുടെ യോഗ്യതയുമായി ബന്ധപ്പെട്ട കേസിൽ കോടതിവിധി അനുസരിച്ച് തുടർ നിലപാട് സ്വീകരിക്കുമെന്ന് രാജ്ഭവൻ അറിയിച്ചു. പാഷയ്ക്ക് പകരം വിപി ജഗധിരാജ് എത്തുമെന്നും രാജ്ഭവൻ അറിയിച്ചു.

ഗവർണറുടെ നിലപാട് കടുപ്പിച്ച് ഓപ്പൺ യൂണിവേഴ്സിറ്റി വിസി പാഷ രാജി സമർപ്പിച്ചു. ഹൈക്കോടതിയുടെ നിർദേശപ്രകാരം നാല് വിസിമാർക്കും തങ്ങളുടെ ഭാഗം ബോധിപ്പിക്കാൻ രാജ്ഭവനിൽ ഹിയറിങ് നടന്നു. അതിനു കാത്തുനിൽക്കാതെ കഴിഞ്ഞ ദിവസം പാഷ രാജി സമർപ്പിച്ചു. ഡിജിറ്റൽ വിസി സജി ഗോപിനാഥ് നേരിട്ടെത്തി. കാലിക്കറ്റ് വിസിയുടെ അഭിഭാഷകനാണ് വാദം കേൾക്കാനെത്തിയത്.

സംസ്കൃതം VC യുടെ അഭിഭാഷകൻ ഓൺലൈനിൽ വന്നു. യുജിസി ജോയിൻ്റ് സെക്രട്ടറിയും യുജിസിയുടെ സ്റ്റാൻഡിങ് കൗൺസിലർമാരും ഗവർണറും ഹിയറിംഗിൽ പങ്കെടുത്തു. വിസി നിയമനം യുജിസി റെഗുലേഷൻ്റെ മാനദണ്ഡപ്രകാരമല്ലെന്നാണ് ഹിയറിംഗിൽ യുജിസി പ്രതിനിധി സ്വീകരിച്ച നിലപാട്.

ആദ്യ വിസിയായി സർക്കാരിന് നേരിട്ട് നിയമനം നടത്താമെന്നായിരുന്നു ഡിജിറ്റൽ വിസിയുടെ വിശദീകരണം. യുജിസി അയോഗ്യതയുടെ പേരിൽ ഡോ രാജശ്രീ കെടിയു വിസിയെ സുപ്രീം കോടതി പുറത്താക്കിയതിനെ തുടർന്നാണ് മറ്റ് 11 വിസിമാർക്കെതിരെ ഗവർണർ നടപടി ആരംഭിച്ചത്. ബാക്കിയുള്ള നാല് പേർക്കെതിരെയാണ് രാജ്ഭവൻ നീങ്ങിയത്.

ഓപ്പൺ, ഡിജിറ്റൽ വിസിമാരെ യുജിസി പ്രതിനിധിയില്ലാതെ സർക്കാർ നേരിട്ട് നിയമിച്ചതാണ് പ്രശ്നം. സെർച്ച് കമ്മിറ്റിയിലെ ചീഫ് സെക്രട്ടറിയായിരുന്നു കാലിക്കറ്റ് വിസി നിയമനത്തിൽ നിയമതടസ്സം.