ഏറ്റവും കൂടുതൽ വിദ്യാർത്ഥികൾ പരാജയപ്പെട്ടത് വയനാട്ടിലാണ്, ഏറ്റവും കുറവ് കൊല്ലത്താണ്; ‘മിനിമം മാർക്ക് ലഭിക്കാത്തവർക്കുള്ള പ്രത്യേക ക്ലാസുകൾ’

തിരുവനന്തപുരം: എട്ടാം ക്ലാസിൽ മിനിമം മാർക്ക് ലഭിക്കാത്ത വിദ്യാർത്ഥികൾക്കായി പ്രത്യേക ക്ലാസുകൾ നടത്തുമെന്ന് വിദ്യാഭ്യാസ മന്ത്രി വി ശിവൻകുട്ടി പറഞ്ഞു. മിനിമം മാർക്കിന്റെ അടിസ്ഥാനത്തിൽ എട്ടാം ക്ലാസ് പരീക്ഷാഫലം ഇന്നലെ പ്രസിദ്ധീകരിച്ചു. ഇതുവരെ 2241 സ്കൂളുകളിൽ നിന്ന് ഈ കണക്കുകൾ ലഭ്യമാണെന്ന് മന്ത്രി പത്രസമ്മേളനത്തിൽ അറിയിച്ചു.

വയനാട് ജില്ലയിലാണ് ഏറ്റവും കൂടുതൽ തോൽവി. കൊല്ലത്താണ് ഏറ്റവും കുറവ്. ഹിന്ദി വിഷയത്തിലും ഇംഗ്ലീഷിലുമാണ് കൂടുതൽ കുട്ടികൾ പരാജയപ്പെട്ടത്. ഓരോ വിഷയത്തിനും കുറഞ്ഞ മാർക്ക് 30 ശതമാനമാണ്. മിനിമം മാർക്കിനെ എതിർക്കുന്നവർ കുട്ടികളുടെ സാഹചര്യം മനസ്സിലാക്കണം. മിനിമം മാർക്കിന്റെ കണക്കുകൾ ജില്ലാതലത്തിൽ പരിശോധിച്ച് താരതമ്യം ചെയ്യും.

ഒരു വിഷയത്തിൽ മാത്രം പരാജയപ്പെട്ട കുട്ടികളുടെ എണ്ണം പരിശോധിക്കും. എഴുത്തുപരീക്ഷയിൽ യോഗ്യതാ മാർക്ക് ലഭിക്കാത്ത വിദ്യാർത്ഥികളുടെ വിവരങ്ങൾ രക്ഷിതാക്കൾക്ക് നൽകും. ഏപ്രിൽ 8 മുതൽ 24 വരെ തിരഞ്ഞെടുക്കപ്പെട്ട വിദ്യാർത്ഥികൾക്ക് പ്രത്യേക ക്ലാസുകൾ നൽകാൻ തീരുമാനിച്ചു.

ആവശ്യമായ മാർക്ക് നേടാത്ത വിഷയങ്ങൾക്ക് മാത്രമേ വിദ്യാർത്ഥികൾ ക്ലാസുകളിൽ പങ്കെടുക്കേണ്ടതുള്ളൂ. രാവിലെ 9.30 മുതൽ ഉച്ചയ്ക്ക് 12.30 വരെ പ്രത്യേക ക്ലാസ് ഉണ്ടായിരിക്കും. ഏപ്രിൽ 25 മുതൽ 28 വരെ പുനഃപരീക്ഷകൾ നടത്താനും തീരുമാനിച്ചു. പുനഃപരീക്ഷാഫലം ഏപ്രിൽ 30 ന് പ്രസിദ്ധീകരിക്കും. അടുത്ത വർഷം ഏഴാം ക്ലാസിന് മിനിമം മാർക്ക് നടപ്പിലാക്കുമെന്നും മന്ത്രി പത്രസമ്മേളനത്തിൽ പറഞ്ഞു.