കേന്ദ്രത്തിൽ നിന്ന് ലഭിക്കാനുള്ള തുകയുടെ കാര്യത്തിൽ സംസ്ഥാനം കള്ളം പറയുകയാണ്; വി ഡി സതീശൻ

തിരുവനന്തപുരം: കേന്ദ്രത്തിൽ നിന്ന് ലഭിക്കാനുള്ള തുകയുടെ കാര്യത്തിൽ സംസ്ഥാനം കള്ളം പറയുകയാണെന്ന് പ്രതിപക്ഷ നേതാവ് വി ഡി സതീശൻ. അവർ ഇത്രയും തുക നൽകേണ്ടതില്ല. പ്രതിസന്ധിയുടെ മുഴുവൻ കാരണവും കേന്ദ്രസർക്കാരല്ലെന്നും അദ്ദേഹം പറഞ്ഞു. കേന്ദ്രത്തിൽ നിന്ന് 1800 കോടി രൂപ ലഭിക്കുമെന്നത് കള്ളമാണ്. അത് നുണയാണ്. ഊതിപ്പെരുപ്പിച്ച കണക്കാണ്. ഞങ്ങൾ അത് നിയമസഭയിൽ വ്യക്തമാക്കിയിരുന്നു’ സതീശൻ പറഞ്ഞു.

പിണറായിക്കെതിരായ കേന്ദ്ര അന്വേഷണങ്ങൾ കേന്ദ്രമന്ത്രി വി മുരളീധരൻ ഒത്തുതീർപ്പാക്കുകയാണെന്നും അദ്ദേഹം പറഞ്ഞു. വി മുരളീധരൻ മുഖ്യമന്ത്രിയുമായി രാത്രി സംസാരിച്ചു. കേന്ദ്രത്തിലെ സംഘപരിവാർ നേതൃത്വത്തിനും കേരളത്തിലെ സി.പി.എം നേതൃത്വത്തിനും ഇടയിൽ മധ്യസ്ഥനാണ്. പകരം മുരളീധരൻ്റെ വലംകൈയായ സുരേന്ദ്രനെ കേസിൽ നിന്ന് രക്ഷപ്പെടുത്തി.

മുഖ്യമന്ത്രിയുടെ മകൾ വീണാ വിജയനെതിരായ പണമിടപാട് വിവാദത്തിൽ സീരിയസ് ഫ്രോഡ് ഇൻവെസ്റ്റിഗേഷൻ്റെ (എസ്എഫ്ഐഒ) അന്വേഷണം പ്രതിപക്ഷം ശ്രദ്ധയോടെ നിരീക്ഷിക്കുകയാണെന്ന് വി ഡി സതീശൻ പറഞ്ഞു. മുഖ്യമന്ത്രിക്കെതിരെയും അന്വേഷണം വേണം. അന്വേഷണത്തിന് എട്ട് മാസമെടുത്തത് എന്തിനാണെന്നും അദ്ദേഹം ചോദിച്ചു.

അതേസമയം കേന്ദ്രത്തിൻ്റെ അവഗണനയ്‌ക്കെതിരെ മുഖ്യമന്ത്രിയുടെ നേതൃത്വത്തിൽ ഡൽഹിയിൽ എൽഡിഎഫ് പ്രതിഷേധം ഉടൻ ആരംഭിക്കും. സീതാറാം യെച്ചൂരി ഉൾപ്പെടെയുള്ള നേതാക്കൾ പങ്കെടുക്കും. കേരള ഹൗസിൽ നിന്നാണ് മാർച്ച് ആരംഭിക്കുക.