‘ഈ കറുത്ത നിറമുള്ള ഷെഫ്…’; ട്രോളിന് കേരള ഷെഫ് കാർത്തികേയൻ സെൽവരാജിന്റെ മറുപടി വൈറൽ

കേരളത്തിൽ നിന്നുള്ള ഷെഫ് കാർത്തികേയൻ സെൽവരാജിന്റെ പാചകവീഡിയോയ്ക്ക് താഴെ നിറത്തെ അധിക്ഷേപിച്ച് വന്ന കമന്റാണ് സോഷ്യൽ മീഡിയയിൽ ചർച്ചയായത്. സ്ട്രീറ്റ്-സ്റ്റൈൽ ചിക്കൻ ഫ്രൈഡ് റൈസിന്റെ വീഡിയോയ്ക്കാണ് മോശം കമന്റ് ലഭിച്ചത്. 

‘നിങ്ങളുടെ കൈ വളരെ കറുത്തതാണ്, നിങ്ങളുടെ കൈകൊണ്ട് ഉണ്ടാക്കിയ ഭക്ഷണം ഞാൻ കഴിക്കില്ല’ എന്നായിരുന്നു കമന്റ്. ഇതിന് നേരിട്ട് തർക്കിക്കാതെ തന്റെ കരിയറിലെ നേട്ടങ്ങൾ ചൂണ്ടിക്കാട്ടിയായിരുന്നു കാർത്തികേയന്റെ മറുപടി. 

ഇന്ത്യയിലെ രാഷ്ട്രത്തലവന്മാർക്കും മുൻ രാഷ്ട്രപതിമാർക്കും പ്രിൻസ് ചാൾസിനും ബെൽജിയം രാജാവിനുമടക്കം ഭക്ഷണം പാകം ചെയ്ത് നൽകിയിട്ടുണ്ടെന്ന് അദ്ദേഹം കുറിച്ചു. നിറത്തിന്റെ പേരിലുള്ള അധിക്ഷേപങ്ങളെ അവഗണിക്കാതെ ഇത്തരം സംഭവങ്ങൾ തുറന്നുകാട്ടുകയാണ് ലക്ഷ്യമെന്നും അദ്ദേഹം വ്യക്തമാക്കി. 

ബുള്ളിയിങ്ങും വംശീയ/നിറവിവേചനപരമായ കമന്റുകളും അംഗീകരിക്കരുതെന്ന സന്ദേശം നൽകാനാണ് പ്രതികരിച്ചതെന്ന് കാർത്തികേയൻ പറഞ്ഞു. അദ്ദേഹത്തിന്റെ മറുപടി പിന്നീട് സോഷ്യൽ മീഡിയയിൽ വ്യാപകമായി ശ്രദ്ധ നേടി.