എറണാകുളത്ത് മാസ്ക് ഉപയോഗം വർദ്ധിക്കുന്നു; ഒരാഴ്ചയ്ക്കുള്ളിൽ മൂന്ന് മരണം; സ്കൂൾ അടച്ചിടണോ?

കൊച്ചി: എറണാകുളം ജില്ലയിൽ പനിയും മറ്റ് പകർച്ചവ്യാധികളും വീണ്ടും പടരുന്നു. മഞ്ഞപ്പിത്തം, ഡെങ്കിപ്പനി, മലേറിയ, ഇൻഫ്ലുവൻസ, വയറിളക്ക രോഗങ്ങൾ തുടങ്ങിയ രോഗങ്ങളുടെ എണ്ണത്തിൽ ഗണ്യമായ വർധനവുണ്ടായതായി ആരോഗ്യ വകുപ്പിന്റെ കണക്കുകൾ വ്യക്തമാക്കുന്നു. ജൂലൈ 25 മുതൽ ഓഗസ്റ്റ് 1 വരെയുള്ള കണക്കുകൾ പ്രകാരം ഡെങ്കിപ്പനി എലിപ്പനി, മഞ്ഞപ്പിത്തം എന്നിവ മൂലം മൂന്ന് പേർ മരിച്ചു.

നെല്ലിക്കുഴി സ്വദേശിയായ 56 വയസ്സുകാരൻ ഡെങ്കിപ്പനി ബാധിച്ചും മുളന്തുരുത്തി സ്വദേശിയായ 56 വയസ്സുകാരൻ എലിപ്പനി ബാധിച്ചും മരിച്ചു. പാതാളം സ്വദേശിയായ 52 വയസ്സുകാരൻ മഞ്ഞപ്പിത്തം ബാധിച്ചും മരിച്ചു. ഈ ദിവസങ്ങളിൽ 6640 പേർ വൈറൽ പനിക്ക് ചികിത്സ തേടി. 166 പേരെ ആശുപത്രിയിൽ പ്രവേശിപ്പിച്ചു.

ഡെങ്കിപ്പനി ലക്ഷണങ്ങളുമായി എത്തിയ 174 പേരിൽ 53 പേരെ കിടത്തി ചികിത്സയ്ക്കായി പ്രവേശിപ്പിച്ചു. 17 പേർക്ക് എലിപ്പനി ബാധിച്ചപ്പോൾ 13 പേർക്ക് മലേറിയ സ്ഥിരീകരിച്ചു. 1103 പേർ വയറിളക്ക രോഗങ്ങൾക്ക് ചികിത്സ തേടി.

സ്കൂൾ അടച്ചുപൂട്ടാൻ നിർദ്ദേശം

ഫെബ്രുവരി അവസാനം മെനിഞ്ചൈറ്റിസ് ബാധിച്ച് കുട്ടികൾ ചികിത്സ തേടിയതിനെ തുടർന്ന് അടച്ചുപൂട്ടേണ്ടിവന്ന കളമശ്ശേരിയിലെ ഒരു സ്കൂൾ ഇത്തവണയും പകർച്ചവ്യാധിയുടെ പിടിയിലാണ്. ഒന്നിലധികം വിദ്യാർത്ഥികൾക്ക് എച്ച്1എൻ1 ഉം പനിയും ഉണ്ട്. ക്ലാസുകൾ ഓൺലൈനാക്കണമെന്ന് മാതാപിതാക്കൾ അഭ്യർത്ഥിച്ചിട്ടുണ്ടെങ്കിലും, വിഷമിക്കേണ്ട കാര്യമില്ലെന്ന് അധികൃതർ അഭിപ്രായപ്പെടുന്നു.

കുസാറ്റ് നാളെ തുറക്കും

എച്ച്1എൻ1, ചിക്കൻപോക്സ് വ്യാപനത്തെത്തുടർന്ന് അഞ്ച് ദിവസത്തേക്ക് ഓൺലൈനായി ക്ലാസുകൾ നടത്തിയിരുന്ന കുസാറ്റ് കാമ്പസ് ഇന്ന് ഓഫ്‌ലൈൻ ക്ലാസുകൾ ആരംഭിക്കും.

മാസ്കുകൾ വീണ്ടും

പന്നിപ്പനിയും പകർച്ചവ്യാധികളും വർദ്ധിച്ചതോടെ മാസ്കുകളുടെ ഉപയോഗവും വ്യാപകമായി വർദ്ധിച്ചു. ആശുപത്രി ജീവനക്കാർക്കും രോഗികളുമായി അടുത്ത ബന്ധം പുലർത്തുന്നവർക്കും മാസ്കുകൾ നിർബന്ധമാക്കിയിട്ടുണ്ട്. ജില്ലയിലെ പല സ്കൂളുകളും കുട്ടികളോട് മാസ്ക് ധരിക്കാൻ നിർദ്ദേശം നൽകിയിട്ടുണ്ട്. പൊതുസ്ഥലങ്ങളിൽ മാസ്ക് ഉപയോഗിക്കുന്നവരുടെ എണ്ണവും വർദ്ധിച്ചു.

പകർച്ചവ്യാധി ബാധിത പ്രദേശങ്ങൾ

👉എലിപ്പനി: അങ്കമാലി, തൃപ്പൂണിത്തുറ, നായരമ്പലം, കളമശ്ശേരി, കൂനമ്മാവ്, വടവുകോട്, ചേരാനല്ലൂർ, കാക്കനാട്, ചമ്പക്കര.

👉മലേറിയ: രാമമംഗലം, പട്ടിമറ്റം, ആലുവ, പെരുമ്പാവൂർ, മലയിടംതുരുത്ത്, കാഞ്ഞൂർ, കാലടി, അയ്യമ്പിള്ളി.

👉ഡെങ്കിപ്പനി: വെങ്ങോല, മുളവുകാട്, ചെങ്ങമനാട്, കൂവപ്പടി, പുതുവൈപ്പ്, നെടുമ്പാശ്ശേരി, തമ്മനം, കടയിരുപ്പ്, കലൂർ.