ക്ഷേമപെൻഷൻ: ബാങ്ക് അക്കൗണ്ട് ബന്ധിപ്പിക്കാൻ ഗുണഭോക്താക്കൾക്ക് സമയം അനുവദിച്ചു

കേരളത്തിലെ സാമൂഹ്യസുരക്ഷാ പെൻഷൻ, ക്ഷേമനിധി ബോർഡ് പെൻഷൻ ഗുണഭോക്താക്കൾക്ക് ബാങ്ക് അക്കൗണ്ട് ബന്ധിപ്പിക്കുന്നതിനായി സമയം അനുവദിച്ചു. ആധാറുമായി ബന്ധിപ്പിച്ച ബാങ്ക് അക്കൗണ്ടിലേക്ക് നേരിട്ട് പെൻഷൻ എത്തിക്കുന്ന Direct Benefit Transfer (DBT) സംവിധാനത്തിലേക്ക് മാറുന്നതിന്റെ ഭാഗമായാണ് നടപടി. 

നിലവിൽ സഹകരണ ബാങ്കുകൾ വഴി വീടുകളിലെത്തിച്ച് പെൻഷൻ വിതരണം ചെയ്യുന്ന രീതിക്ക് പകരം, ആധാർ ലിങ്ക് ചെയ്ത ബാങ്ക് അക്കൗണ്ടിലേക്ക് നേരിട്ട് തുക കൈമാറാനാണ് സർക്കാർ തീരുമാനിച്ചിരിക്കുന്നത്. കിടപ്പുരോഗികളായ ഗുണഭോക്താക്കൾക്ക് ഉൾപ്പെടെ ഒഴിവാക്കാനാകാത്ത പ്രത്യേക സാഹചര്യങ്ങളിൽ നിലവിലെ രീതിയിൽ പെൻഷൻ ലഭിക്കുന്നതിനുള്ള വ്യവസ്ഥ തുടരും. 

ബാങ്ക് അക്കൗണ്ട് വിവരങ്ങൾ കൃത്യമായി ബന്ധിപ്പിക്കുന്നതിലൂടെ പെൻഷൻ വിതരണത്തിലെ കാലതാമസം, രേഖകളിലെ പൊരുത്തക്കേട്, ഇരട്ട വിതരണം തുടങ്ങിയ പ്രശ്നങ്ങൾ ഒഴിവാക്കാനാകുമെന്നാണ് സർക്കാരിന്റെ വിലയിരുത്തൽ. DBT മാനദണ്ഡങ്ങൾ പാലിക്കുന്നതിലൂടെ കേന്ദ്രസഹായം നഷ്ടപ്പെടാതിരിക്കാനും നടപടി സഹായിക്കുമെന്ന് സർക്കാർ ചൂണ്ടിക്കാട്ടുന്നു. 

സംസ്ഥാനത്ത് സാമൂഹ്യസുരക്ഷാ പെൻഷൻ വിഭാഗത്തിൽ മാത്രം 51 ലക്ഷത്തിലധികം ഗുണഭോക്താക്കളുണ്ട്. 2026 ജൂലൈയിലെ സാമൂഹ്യസുരക്ഷാ പെൻഷൻ വിതരണത്തിനായി 51,10,908 ഗുണഭോക്താക്കൾക്കായി ₹941.73 കോടി അനുവദിച്ചിരുന്നു.