നവകേരള സദസിനിടെ യൂത്ത് കോൺഗ്രസ് പ്രവർത്തകർക്ക് മർദനം; മുഖ്യമന്ത്രിയുടെ സുരക്ഷാ ഉദ്യോഗസ്ഥർക്ക് നോട്ടീസ് നൽകി

തിരുവനന്തപുരം: നവകേരള സദസിനിടെ യൂത്ത് കോൺഗ്രസ് പ്രവർത്തകരെ മർദിച്ച കേസിൽ മുഖ്യമന്ത്രിയുടെ സുരക്ഷാ ഉദ്യോഗസ്ഥർക്ക് നോട്ടീസ്. ഗൺമാൻ അനിൽകുമാറിനും സുരക്ഷാ സേനയിലെ എസ് സന്ദീപിനും തിങ്കളാഴ്ച ഹാജരാകാൻ നോട്ടീസ് നൽകിയിട്ടുണ്ട്. ആലപ്പുഴ സൗത്ത് സ്റ്റേഷനിലെ ഉദ്യോഗസ്ഥർ നേരിട്ട് തിരുവനന്തപുരത്തെത്തി നോട്ടീസ് കൈമാറി.

അനിൽകുമാറാണ് കേസിലെ ഒന്നാം പ്രതി. സുരക്ഷാ സേനയിലെ അറിയപ്പെടുന്ന ഉദ്യോഗസ്ഥർക്കെതിരെയും കേസെടുത്തിട്ടുണ്ട്. കോടതി ഉത്തരവ് പ്രകാരം കേസെടുത്ത് ഒരു മാസത്തിന് ശേഷം നടപടിയെടുക്കാൻ പോലീസ് തയ്യാറായി. ആയുധം ഉപയോഗിച്ചുള്ള ആക്രമണം, ദേഹോപദ്രവം ഏൽപ്പിക്കൽ, അസഭ്യം പറയൽ തുടങ്ങിയ കുറ്റങ്ങളാണ് പ്രതികൾക്കെതിരെ ചുമത്തിയിരിക്കുന്നത്. ജാമ്യം ലഭിക്കാവുന്ന വകുപ്പുകളാണെങ്കിലും കോടതിയിൽ കുറ്റം തെളിഞ്ഞാൽ ഏഴ് വർഷം വരെ തടവ് ലഭിക്കും.

യൂത്ത് കോൺഗ്രസ് സംസ്ഥാന ജനറൽ സെക്രട്ടറി അഭിഭാഷകൻ അജയ് ജുവൽ, കെഎസ്‌യു ജില്ലാ പ്രസിഡന്റ് എ ഡി തോമസ് എന്നിവർ നൽകിയ ഹർജിയിലാണ് ആലപ്പുഴ ജുഡീഷ്യൽ ഫസ്റ്റ് ക്ലാസ് മജിസ്‌ട്രേറ്റ് കോടതി ഇടപെട്ടത്. സുരക്ഷാ ഉദ്യോഗസ്ഥർക്കെതിരെ ഐപിസി 294 ബി, 326,324 പ്രകാരം കേസെടുക്കണമെന്നായിരുന്നു ഹർജിയിലെ ആവശ്യം.

ഡിസംബർ 16ന് ആലപ്പുഴയിൽ നിന്ന് മുഖ്യമന്ത്രിയും മന്ത്രിമാരും അമ്പലപ്പുഴ നിയോജക മണ്ഡലത്തിലെ നവകേരള സദസിലേക്ക് ബസിൽ പോകുമ്പോൾ ജനറൽ ആശുപത്രി ജംഗ്ഷനിൽ മുദ്രാവാക്യം വിളിച്ച ഇരുവരെയും ഡ്യൂട്ടിയിലുണ്ടായിരുന്ന പോലീസുകാർ കസ്റ്റഡിയിലെടുത്ത് മർദിക്കുകയായിരുന്നു. തോമസിന് തലയ്ക്ക് പരിക്കേറ്റു, അജയ് ജുവലിന്റെ കൈയ്ക്ക് പൊട്ടലുണ്ടായി.

ഇരുവരും സൗത്ത് പോലീസിൽ പരാതി നൽകിയെങ്കിലും കേസെടുത്തില്ല. തുടർന്ന് ജില്ലാ പൊലീസ് മേധാവിക്ക് നൽകിയ പരാതിയിൽ റിപ്പോർട്ട് തേടിയപ്പോൾ ലാത്തിച്ചാർജ് ഒഴിവാക്കാനാകില്ലെന്നായിരുന്നു സൗത്ത് പൊലീസിന്റെ മറുപടി.