മഹാകുംഭമേളയിൽ തിക്കിലും തിരക്കിലും 15 പേർ മരിച്ചു, നിരവധി പേർക്ക് പരിക്കേറ്റു

പ്രയാഗ്രാജ്: മഹാകുംഭമേളയിലെ പ്രധാന പരിപാടിയായ മൗനി അമാവാസി ആഘോഷത്തിനിടെയുണ്ടായ തിക്കിലും തിരക്കിലും 15 പേർ മരിക്കുകയും നിരവധി പേർക്ക് പരിക്കേൽക്കുകയും ചെയ്തു. മൗനി അമാവാസിയിൽ അമൃത് സ്നാനത്തിന് ആളുകൾ എത്തിയപ്പോഴാണ് ദുരന്തമുണ്ടായത്.

അഭൂതപൂർവമായ തിരക്കായിരുന്നു അനുഭവപ്പെട്ടത്. സംഭവത്തിന്റെ വിശദാംശങ്ങൾ നൽകാൻ പ്രധാനമന്ത്രി നരേന്ദ്ര മോദി ഉത്തർപ്രദേശ് മുഖ്യമന്ത്രി യോഗി ആദിത്യനാഥിനോട് ആവശ്യപ്പെട്ടു. എന്നിരുന്നാലും, മരണങ്ങളെക്കുറിച്ചുള്ള വാർത്താ ഏജൻസികളുടെ റിപ്പോർട്ടുകൾ അധികൃതർ സ്ഥിരീകരിച്ചിട്ടില്ല.

ബുധനാഴ്ച പുലർച്ചെ 1.30 ഓടെയാണ് സംഭവം. മരിച്ചവരുടെയോ പരിക്കേറ്റവരുടെയോ വിവരങ്ങൾ ഔദ്യോഗികമായി പുറത്തുവിട്ടിട്ടില്ല. ജനക്കൂട്ടം കാരണം നിരവധി സ്ത്രീകൾക്കും കുട്ടികൾക്കും ശ്വസിക്കാൻ ബുദ്ധിമുട്ട് അനുഭവപ്പെട്ടതായി റിപ്പോർട്ടുകളുണ്ട്. അപകടത്തിന് തൊട്ടുപിന്നാലെ ആംബുലൻസുകൾ അയയ്ക്കുകയും പലരെയും ആശുപത്രിയിലേക്ക് മാറ്റുകയും ചെയ്തു.

സംഭവത്തെത്തുടർന്ന് അമാവാസി ദിനത്തിലെ അമൃത് സ്നാന ചടങ്ങ് റദ്ദാക്കിയതായി അഖില ഭാരതീയ അഖാര പരിഷത്ത് പ്രസിഡന്റ് മഹന്ദ് രവീന്ദ്ര പുരി പ്രഖ്യാപിച്ചു. ഗംഗയിൽ കുളിച്ച ശേഷം ഭക്തർ മടങ്ങാനും നിർദ്ദേശിച്ചിട്ടുണ്ട്.

ഭക്തർ കിംവദന്തികൾക്ക് ചെവികൊടുക്കരുതെന്നും ഭരണകൂടത്തിന്റെ നിർദ്ദേശങ്ങൾ പാലിക്കണമെന്നും മുഖ്യമന്ത്രി യോഗി ആദിത്യനാഥ് അഭ്യർത്ഥിച്ചു. തിരക്ക് ഒഴിവാക്കാൻ സംഗം നോസിലേക്ക് പോകുന്നതിനുപകരം അടുത്തുള്ള ഘട്ടിൽ കുളിക്കണമെന്നും അദ്ദേഹം ഭക്തരോട് അഭ്യർത്ഥിച്ചു.