ബിഹാറിലും ഹരിയാനയിലും 44,250 വെടിയുണ്ടകൾ പിടിച്ചെടുത്തു

ന്യൂഡൽഹി: ബിഹാറിലും ഹരിയാനയിലുമായി 44,250 വെടിയുണ്ടകൾ പിടിച്ചെടുത്ത സംഭവത്തിൽ ആർഎസ്എസിനും ബിജെപിക്കുമെതിരെ ചോദ്യങ്ങളുയർത്തി കർണാടക മന്ത്രി പ്രിയങ്ക് ഖാർഗെ. പിടിയിലായവരിൽ ചിലർ ആർഎസ്എസ് യൂണിഫോം ധരിച്ചുനിൽക്കുന്ന ചിത്രങ്ങൾ പുറത്തുവന്നതായുള്ള റിപ്പോർട്ടുകൾ ചൂണ്ടിക്കാട്ടിയാണ് ഖാർഗെയുടെ പ്രതികരണം. സംഭവത്തെ സാധാരണ കുറ്റകൃത്യമായി കാണാനാകില്ലെന്നും രാജ്യസുരക്ഷയെ ബാധിക്കുന്ന ഗുരുതര വിഷയമാണെന്നും അദ്ദേഹം പറഞ്ഞു.

പിടിയിലായവർ ആർഎസ്എസ് പ്രവർത്തകരാണോ, സംഘടനയിൽ അവർക്ക് എന്ത് സ്ഥാനമാണുള്ളത്, വെടിയുണ്ടകൾ എവിടേക്കാണ് കൊണ്ടുപോകാൻ ഉദ്ദേശിച്ചിരുന്നത് തുടങ്ങിയ ചോദ്യങ്ങളാണ് ഖാർഗെ ഉന്നയിച്ചത്. സർക്കാർ ഉടമസ്ഥതയിലുള്ള ഖഡ്കി വെടിക്കോപ്പു നിർമാണശാലയുമായി ബന്ധപ്പെട്ട അടയാളങ്ങൾ വെടിയുണ്ടകളിൽ ഉണ്ടായിരുന്നതായുള്ള റിപ്പോർട്ടുകളും അദ്ദേഹം ചൂണ്ടിക്കാട്ടി. സർക്കാർ നിർമിക്കുന്ന വെടിയുണ്ടകൾ എങ്ങനെയാണ് അനധികൃത വിപണിയിലെത്തിയതെന്നും ഇതിന് പിന്നിൽ പ്രവർത്തിച്ചവർ ആരാണെന്നും കണ്ടെത്തണമെന്ന് അദ്ദേഹം ആവശ്യപ്പെട്ടു.

ആർഎസ്എസ് മേധാവി മോഹൻ ഭാഗവതിനെയും ഖാർഗെ വിമർശിച്ചു. സംഘടനയ്ക്ക് ലക്ഷക്കണക്കിന് പ്രവർത്തകരുണ്ടെന്ന് അവകാശപ്പെടുകയും ഗുരുതരമായ ആരോപണങ്ങൾ ഉയരുമ്പോൾ വ്യക്തികളെ സംഘടനയിൽനിന്ന് അകറ്റിനിർത്തുകയും ചെയ്യുന്ന നിലപാട് ശരിയല്ലെന്ന് അദ്ദേഹം പറഞ്ഞു. ആർഎസ്എസിന് ഔദ്യോഗിക രജിസ്ട്രേഷൻ വേണമെന്ന ആവശ്യവും ഖാർഗെ ആവർത്തിച്ചു. സംഘടനയുടെ രജിസ്ട്രേഷൻ നടപടികൾക്ക് സഹായിക്കാനും അതിനുള്ള ഫീസ് നൽകാനും തയ്യാറാണെന്നും പരിഹാസരൂപേണ അദ്ദേഹം വ്യക്തമാക്കി.

നവംബർ രണ്ടിന് ബിഹാറിലെ ഭോജ്പൂരിൽ നടത്തിയ പരിശോധനയിൽ 19,250 വെടിയുണ്ടകൾ പിടിച്ചെടുത്ത് മൂന്നുപേരെ അറസ്റ്റ് ചെയ്തിരുന്നു. തുടർന്ന് നവംബർ മൂന്നിന് ഹരിയാനയിലെ ഝജ്ജറിൽ നടത്തിയ പരിശോധനയിൽ 25,000 വെടിയുണ്ടകൾ കൂടി പിടിച്ചെടുത്തു. സംഭവവുമായി ബന്ധപ്പെട്ട് ഹരിയാനയിൽ അഞ്ചുപേരെ അറസ്റ്റ് ചെയ്തതായാണ് റിപ്പോർട്ടുകൾ. വെടിയുണ്ടകളുടെ ഉറവിടം, വിതരണശൃംഖല, അന്തിമമായി ലഭിക്കേണ്ടിയിരുന്നവർ എന്നിവ കണ്ടെത്തുന്നതിനുള്ള അന്വേഷണം തുടരുകയാണ്. അതേസമയം, പ്രതികൾക്ക് ആർഎസ്എസുമായി സംഘടനാപരമായ ബന്ധമുണ്ടെന്ന ആരോപണം അന്വേഷണ ഏജൻസികൾ ഔദ്യോഗികമായി സ്ഥിരീകരിച്ചിട്ടില്ല. ആർഎസ്എസിന്റെ യൂണിഫോമിലുള്ള ചിത്രങ്ങൾ മാത്രം സംഘടനയുടെ പങ്കാളിത്തത്തിന് തെളിവാകില്ലെന്നും റിപ്പോർട്ടുകൾ വ്യക്തമാക്കുന്നു.