ഫേസ്ബുക്ക് ലൈവിന് പിന്നാലെ ആദിവാസി പ്രവർത്തക നിഷാ ഭഗത്തിന്റെ മരണം

ജാർഖണ്ഡിലെ ആദിവാസി അവകാശ പ്രവർത്തക നിഷാ കുമാരി ഭഗത്തിന്റെ മരണത്തിന് പിന്നാലെ അവരുടെ അവസാന ഫേസ്ബുക്ക് ലൈവിലെ ആരോപണങ്ങൾ ചർച്ചയാകുന്നു. വെള്ളിയാഴ്ച റാഞ്ചിയിലെ വസതിയിലാണ് നിഷയെ മരിച്ച നിലയിൽ കണ്ടെത്തിയത്. മരണത്തിന് തൊട്ടുമുമ്പ് ഫേസ്ബുക്കിൽ ലൈവിലെത്തിയ അവർ സംസ്ഥാന സർക്കാരിനും ഭൂമാഫിയകൾക്കും എതിരെ ഗുരുതര ആരോപണങ്ങൾ ഉന്നയിച്ചിരുന്നു. സംഭവത്തിൽ പൊലീസ് അന്വേഷണം ആരംഭിച്ചിട്ടുണ്ട്.

ഹേമന്ത് സോറൻ സർക്കാരിനും സർക്കാരുമായി ബന്ധമുള്ളതായി ആരോപിക്കപ്പെടുന്ന ഭൂമി ഇടനിലക്കാർക്കുമെതിരെ ശബ്ദമുയർത്തുന്നവർക്ക് ഭീഷണിയും അപമാനവും നേരിടേണ്ടിവരുന്നുവെന്നായിരുന്നു നിഷയുടെ ആരോപണം. ആദിവാസി സമൂഹത്തിന്റെ അവകാശങ്ങൾക്കായി ഏറെക്കാലമായി പോരാടിയിട്ടും ഭരണകൂടത്തിൽനിന്ന് സംരക്ഷണമോ പിന്തുണയോ ലഭിച്ചില്ലെന്നും അവർ വീഡിയോയിൽ പറഞ്ഞു. തന്റെ പരാതികളിൽ ഭരണകൂടവും പൊലീസും ആവശ്യമായ നടപടി സ്വീകരിച്ചില്ലെന്നും ആരോപിച്ചു.

പിഠോറിയ പൊലീസ് സ്റ്റേഷനിലെ ഉദ്യോഗസ്ഥനുമായി ഫേസ്ബുക്ക് ലൈവിനിടെ നിഷ ഫോണിൽ സംസാരിക്കുകയും ചെയ്തു. വീട്ടിൽ നടന്ന മോഷണവുമായി ബന്ധപ്പെട്ട പരാതിയിൽ പ്രതികളെ കണ്ടെത്താത്തതിലും തന്നെ അപകീർത്തിപ്പെടുത്തുന്നവർക്കെതിരെ നടപടിയെടുക്കാത്തതിലും അവർ അതൃപ്തി പ്രകടിപ്പിച്ചു. ഭൂമി ഇടപാടുകളുമായി ബന്ധപ്പെട്ട ചില വ്യക്തികളുടെ പ്രവർത്തനങ്ങളും ഭരണകൂടത്തിന്റെ സമീപനവും തന്റെ ആശങ്കകൾക്ക് കാരണമാണെന്നും അവർ ആരോപിച്ചു.

ആദിവാസി മത-സാംസ്കാരിക സ്വത്വം, സര്നാ വിശ്വാസം, മതപരിവർത്തനം തുടങ്ങിയ വിഷയങ്ങളിൽ സജീവമായി ഇടപെട്ടിരുന്ന വ്യക്തിയായിരുന്നു നിഷാ ഭഗത്. 2024ലെ ജാർഖണ്ഡ് നിയമസഭാ തിരഞ്ഞെടുപ്പിൽ ഗുംല മണ്ഡലത്തിൽനിന്ന് ജെഎൽകെഎം സ്ഥാനാർഥിയായി മത്സരിച്ചിരുന്നെങ്കിലും വിജയിക്കാനായില്ല. ആദിവാസി സമൂഹത്തിന്റെ അവകാശങ്ങൾക്കും ഭൂമിയുമായി ബന്ധപ്പെട്ട പ്രശ്നങ്ങൾക്കുമായി അവർ നിരന്തരം ശബ്ദമുയർത്തിയിരുന്നു.

നിഷയുടെ മരണത്തിൽ സംസ്ഥാന സർക്കാരിനെതിരെ പ്രതിപക്ഷമായ ബിജെപി രംഗത്തെത്തിയിട്ടുണ്ട്. സംഭവത്തിൽ സിബിഐ അന്വേഷണം വേണമെന്നും ഉത്തരവാദികളായവർക്കെതിരെ നടപടി സ്വീകരിക്കണമെന്നും ബിജെപി നേതാക്കൾ ആവശ്യപ്പെട്ടു. അതേസമയം, ഭരണകൂടത്തിനെതിരായ ആരോപണങ്ങൾ ഉൾപ്പെടെ എല്ലാ വശങ്ങളും പരിശോധിച്ച് നിഷയുടെ മരണത്തിലേക്ക് നയിച്ച സാഹചര്യങ്ങൾ കണ്ടെത്താനാണ് പൊലീസിന്റെ നീക്കം. ആരോപണങ്ങൾ സ്വതന്ത്രമായി സ്ഥിരീകരിക്കപ്പെട്ടിട്ടില്ല.