എഐഎഡിഎംകെയ്ക്ക് വീണ്ടും തിരിച്ചടി; വിജയഭാസ്കർ രാജിവെച്ചു, തിരഞ്ഞെടുപ്പിന് ശേഷം പാർട്ടി വിടുന്ന ആറാമത്തെ നേതാവ്
തമിഴ്നാട്ടിൽ പ്രതിപക്ഷമായ എഐഎഡിഎംകെയ്ക്ക് വീണ്ടും വലിയ തിരിച്ചടി. മുൻ മന്ത്രിയും കരൂർ എംഎൽഎയുമായ എം.ആർ. വിജയഭാസ്കർ പാർട്ടിയിൽ നിന്നും എംഎൽഎ സ്ഥാനത്തുനിന്നും രാജിവെച്ചു. നിയമസഭാ സ്പീക്കർക്ക് നേരിട്ടെത്തിയാണ് അദ്ദേഹം രാജിക്കത്ത് കൈമാറിയത്. സമീപകാല നിയമസഭാ തിരഞ്ഞെടുപ്പിന് ശേഷം എഐഎഡിഎംകെ വിട്ട ആറാമത്തെ എംഎൽഎയാണ് വിജയഭാസ്കർ.
തിരഞ്ഞെടുപ്പിലെ തിരിച്ചടിക്ക് പിന്നാലെ എഐഎഡിഎംകെയിൽ ആഭ്യന്തര അസ്വാരസ്യങ്ങൾ ശക്തമായ സാഹചര്യത്തിലാണ് പുതിയ രാജി. വിജയഭാസ്കർ ഉടൻ തന്നെ തമിഴക വിജയ് കഴകം (ടിവികെ)യിൽ ചേരാൻ സാധ്യതയുണ്ടെന്നാണ് രാഷ്ട്രീയ വൃത്തങ്ങൾ സൂചിപ്പിക്കുന്നത്.
വിജയഭാസ്കറുടെ രാജിയോടെ തമിഴ്നാട് നിയമസഭയിലെ എഐഎഡിഎംകെയുടെ അംഗബലം വീണ്ടും കുറഞ്ഞു. തുടർച്ചയായ രാജികൾ പാർട്ടി നേതൃത്വത്തിന് വലിയ വെല്ലുവിളിയായി മാറിയിരിക്കുകയാണ്.
അതേസമയം, പാർട്ടിക്കുള്ളിലെ പ്രശ്നങ്ങൾ പരിഹരിച്ച് സംഘടനയെ കൂടുതൽ ശക്തിപ്പെടുത്താനുള്ള നടപടികൾ തുടരുമെന്നാണ് എഐഎഡിഎംകെ നേതൃത്വം പ്രതികരിച്ചിരിക്കുന്നത്. വരും ദിവസങ്ങളിൽ കൂടുതൽ നേതാക്കൾ പാർട്ടി വിടുമോയെന്നതും തമിഴ്നാട് രാഷ്ട്രീയത്തിൽ ശ്രദ്ധേയമായ ചർച്ചയായി മാറിയിരിക്കുകയാണ്.
