ആർബിഐ ഡയറക്ടർ ബോർഡിൽ ആനന്ദ് മഹീന്ദ്രയ്ക്ക് വീണ്ടും നിയമനം; എസ്. സോമനാഥും പുതിയ അംഗം

റിസർവ് ബാങ്ക് ഓഫ് ഇന്ത്യയുടെ (ആർബിഐ) സെൻട്രൽ ബോർഡിൽ മഹീന്ദ്ര ഗ്രൂപ്പ് ചെയർമാൻ ആനന്ദ് മഹീന്ദ്രയെ കേന്ദ്ര സർക്കാർ വീണ്ടും നിയമിച്ചു. മുൻ ഐഎസ്ആർഒ ചെയർമാൻ എസ്. സോമനാഥിനെയും ബോർഡിൽ നോൺ-ഓഫീഷ്യൽ ഡയറക്ടറായി നിയമിച്ചു. ഇരുവരുടെയും നിയമനം ഓഗസ്റ്റ് 20, 2026 മുതൽ നാല് വർഷത്തേക്കാണ്.

ആർബിഐ സെൻട്രൽ ബോർഡിലെ പാർട്ട് ടൈം, നോൺ-ഓഫീഷ്യൽ ഡയറക്ടറായാണ് ആനന്ദ് മഹീന്ദ്രയുടെ പുനർനിയമനം. 2022 ജൂണിലാണ് അദ്ദേഹം ആദ്യമായി ആർബിഐ ബോർഡിൽ അംഗമായത്.

വ്യവസായം, നിർമാണം, ഗ്രാമീണ വിപണി, സാങ്കേതികവിദ്യ, ധനകാര്യ സേവനങ്ങൾ തുടങ്ങിയ മേഖലകളിലെ അനുഭവമാണ് ആനന്ദ് മഹീന്ദ്രയുടെ പുനർനിയമനത്തിലൂടെ ബോർഡിന് ലഭിക്കുക.

അതേസമയം, ഐഎസ്ആർഒയുടെ മുൻ ചെയർമാനായ എസ്. സോമനാഥിന്റെ സാങ്കേതിക-ശാസ്ത്ര രംഗത്തെ പരിചയം ആർബിഐയുടെ പ്രവർത്തനങ്ങൾക്ക് കൂടുതൽ വൈവിധ്യമാർന്ന കാഴ്ചപ്പാട് നൽകുമെന്നാണ് വിലയിരുത്തൽ.