അങ്കിത ഭണ്ഡാരി കൊലക്കേസ്: നടി ഉർമിള സനാവറിന് നാർക്കോ, പോളിഗ്രാഫ് പരിശോധനകൾക്ക് കോടതി ഉത്തരവ്

ഉത്തരാഖണ്ഡിലെ അങ്കിത ഭണ്ഡാരി കൊലക്കേസുമായി ബന്ധപ്പെട്ട് ടെലിവിഷൻ നടി ഉർമിള സനാവറിന് നാർക്കോ അനാലിസിസ്, പോളിഗ്രാഫ് പരിശോധനകൾ നടത്താൻ ഡെറാഡൂൺ കോടതി ഉത്തരവിട്ടു. ഗുജറാത്തിലെ ഗാന്ധിനഗറിലായിരിക്കും പരിശോധനകൾ നടത്തുക. പരിശോധനയ്ക്കുള്ള തീയതി പിന്നീട് തീരുമാനിക്കും. കേസിൽ പരാമർശിക്കപ്പെടുന്ന 'വിഐപി'യുമായി ബന്ധപ്പെട്ട ശബ്ദരേഖയുടെ ആധികാരികത പരിശോധിക്കുന്നതിന്റെ ഭാഗമായാണ് നടപടി.

2022 സെപ്റ്റംബറിലാണ് റിഷികേശിന് സമീപമുള്ള വാനന്താര റിസോർട്ടിൽ റിസപ്ഷനിസ്റ്റായി ജോലി ചെയ്തിരുന്ന 19കാരിയായ അങ്കിത ഭണ്ഡാരി കൊല്ലപ്പെട്ടത്. റിസോർട്ട് ഉടമ പുൽകിത് ആര്യയും രണ്ട് ജീവനക്കാരും കേസിൽ കുറ്റക്കാരാണെന്ന് കണ്ടെത്തിയ കോടതി മൂവർക്കും ജീവപര്യന്തം തടവുശിക്ഷ വിധിച്ചിരുന്നു. എന്നാൽ കേസിൽ ഒരു പ്രമുഖ വ്യക്തിയുടെ പങ്കുണ്ടെന്ന ആരോപണം പിന്നീട് വീണ്ടും രാഷ്ട്രീയ വിവാദങ്ങൾക്ക് വഴിവെച്ചു.

മുൻ ബിജെപി എംഎൽഎ സുരേഷ് റാത്തോഡുമായുള്ള സംഭാഷണത്തിന്റെ ശബ്ദരേഖയാണെന്ന് അവകാശപ്പെട്ട് ഉർമിള സനാവർ പുറത്തുവിട്ട ഓഡിയോയിലാണ് 'വിഐപി' പരാമർശമുള്ളത്. സിക്കിം ഗവർണർ ദുഷ്യന്ത് ഗൗതമിന്റെ പേരാണ് ഇതുമായി ബന്ധപ്പെട്ട് സനാവർ ആരോപണവിധേയമായി ഉന്നയിച്ചിട്ടുള്ളത്. എന്നാൽ ആരോപണങ്ങൾ ഗൗതം നിഷേധിച്ചിട്ടുണ്ട്. ശബ്ദരേഖയുടെ ആധികാരികത സിബിഐ പരിശോധിച്ചുവരികയാണ്. പരിശോധനകൾക്കായി സനാവറും റാത്തോഡും നേരത്തെ സമ്മതം അറിയിച്ചിരുന്നു.