അധിക ലഗേജുമായി യാത്രയാണോ? ഇനി ഓൺലൈനായി ബുക്ക് ചെയ്യാം; പുതിയ സേവനവുമായി ഇന്ത്യൻ റെയിൽവേ

ട്രെയിൻ യാത്രയിൽ അനുവദനീയമായ പരിധിയേക്കാൾ കൂടുതൽ ലഗേജ് കൊണ്ടുപോകുന്ന യാത്രക്കാർക്കായി ഇന്ത്യൻ റെയിൽവേ പുതിയ ഓൺലൈൻ ലഗേജ് ബുക്കിംഗ് സംവിധാനം ആരംഭിച്ചു. ജൂലൈ 31 മുതൽ പ്രാബല്യത്തിൽ വന്ന ഈ സേവനത്തിലൂടെ റെയിൽവേ സ്റ്റേഷനിലെ പാർസൽ ഓഫീസിൽ നീണ്ടനേരം കാത്തുനിൽക്കാതെ അധിക ലഗേജ് മുൻകൂട്ടി ഓൺലൈനായി ബുക്ക് ചെയ്യാൻ കഴിയും. 

സ്ഥിരീകരിച്ച (Confirmed) റിസർവേഷൻ ടിക്കറ്റുള്ള യാത്രക്കാർക്ക് ഐ.ആർ.സി.ടി.സി. (IRCTC) പ്ലാറ്റ്ഫോമിലൂടെ അധിക ലഗേജ് പ്രഖ്യാപിച്ച് ആവശ്യമായ ചാർജ് ഓൺലൈനായി അടയ്ക്കാം. യാത്ര ആരംഭിക്കുന്നതിന് മുമ്പ് അനുവദനീയമായ ലഗേജ് പരിധി, അധിക ഭാരം സംബന്ധിച്ച ചാർജുകൾ, നിരോധിത വസ്തുക്കൾ എന്നിവയെക്കുറിച്ചുള്ള വിവരങ്ങളും സംവിധാനത്തിൽ ലഭ്യമാകും. 

ഈ പുതിയ സംവിധാനം യാത്രക്കാരുടെ സമയം ലാഭിക്കുന്നതിനൊപ്പം സ്റ്റേഷനുകളിലെ തിരക്ക് കുറയ്ക്കാനും ലക്ഷ്യമിടുന്നതാണ്. ലഗേജ് ബുക്കിംഗ് നടപടികൾ കൂടുതൽ സുതാര്യവും സൗകര്യപ്രദവുമാക്കാൻ ഇതിലൂടെ കഴിയുമെന്ന് റെയിൽവേ അധികൃതർ അറിയിച്ചു.