അസം പ്രളയം: മരണം 80 ആയി; 2.12 ലക്ഷം പേർ ദുരിതത്തിൽ, എട്ട് ജില്ലകളിൽ രക്ഷാപ്രവർത്തനം തുടരുന്നു

അസമിലെ പ്രളയത്തിൽ മരിച്ചവരുടെ എണ്ണം 80 ആയി. സിവസാഗർ ജില്ലയിൽ രണ്ട് മൃതദേഹങ്ങൾ കൂടി കണ്ടെത്തിയതോടെയാണ് മരണസംഖ്യ ഉയർന്നത്. ജലനിരപ്പ് താഴുന്നുണ്ടെങ്കിലും സംസ്ഥാനത്തെ എട്ട് ജില്ലകളിലായി ഇപ്പോഴും 2.12 ലക്ഷത്തിലധികം ആളുകൾ പ്രളയബാധിതരായി തുടരുകയാണെന്ന് അസം സംസ്ഥാന ദുരന്തനിവാരണ അതോറിറ്റി (ASDMA) അറിയിച്ചു. 

ഗോലാഘട്ട്, സിവസാഗർ, ബിശ്വനാഥ്, ചരൈദിയോ, കാംറൂപ് (മെട്രോ), ജോർഹട്ട്, ധേമാജി, നാഗാവ് ജില്ലകളിലെ 437 ഗ്രാമങ്ങളെയാണ് പ്രളയം ബാധിച്ചിരിക്കുന്നത്. വിവിധ ദുരിതാശ്വാസ ക്യാമ്പുകളിലേക്കും സുരക്ഷിത കേന്ദ്രങ്ങളിലേക്കും ആയിരക്കണക്കിന് ആളുകളെ മാറ്റിപ്പാർപ്പിച്ചിട്ടുണ്ട്. 

സംസ്ഥാന ദുരന്തനിവാരണ സേന, ദേശീയ ദുരന്തനിവാരണ സേന (NDRF), മറ്റ് ഏജൻസികൾ എന്നിവയുടെ നേതൃത്വത്തിൽ രക്ഷാപ്രവർത്തനവും ദുരിതാശ്വാസ വിതരണവും തുടരുകയാണ്. അതേസമയം, വടക്കുകിഴക്കൻ സംസ്ഥാനങ്ങളിൽ വരും ദിവസങ്ങളിലും ശക്തമായ മഴയ്ക്ക് സാധ്യതയുണ്ടെന്ന് കാലാവസ്ഥാ വകുപ്പ് മുന്നറിയിപ്പ് നൽകിയിട്ടുണ്ട്.