'പ്രചാരണ ഉപകരണങ്ങളായി മാറി'; പ്രതിഷേധിക്കുന്ന വിദ്യാർഥികളെ ഭീഷണിപ്പെടുത്തിയെന്ന് ആരോപിച്ച് ഡിയുവിനും ജെ.എൻ.യുവിനുമെതിരെ രാഹുൽ ഗാന്ധിയും ഖാർഗെയും

ന്യൂഡൽഹി: ജന്തർ മന്തറിലെ വിദ്യാർഥി പ്രതിഷേധങ്ങളിൽ പങ്കെടുക്കരുതെന്ന് മുന്നറിയിപ്പ് നൽകി ഡൽഹി സർവകലാശാലയും (DU) ജവഹർലാൽ നെഹ്റു സർവകലാശാലയും (JNU) പുറത്തിറക്കിയ നിർദേശങ്ങൾക്കെതിരെ കോൺഗ്രസ് നേതാക്കളായ മല്ലികാർജുൻ ഖാർഗെയും രാഹുൽ ഗാന്ധിയും രൂക്ഷ വിമർശനം ഉന്നയിച്ചു. സർവകലാശാലകൾ സർക്കാരിന്റെ "പ്രചാരണ ഉപകരണങ്ങളായി" മാറുകയാണെന്ന് ഖാർഗെ ആരോപിച്ചു. 

വിദ്യാർഥികളെ ഭീഷണിപ്പെടുത്തി പ്രതിഷേധങ്ങളിൽ നിന്ന് പിന്തിരിപ്പിക്കാൻ ശ്രമിക്കുന്നത് അംഗീകരിക്കാനാവില്ലെന്ന് രാഹുൽ ഗാന്ധി പറഞ്ഞു. സമാധാനപരമായി പ്രതിഷേധിക്കാനുള്ള ജനാധിപത്യ അവകാശം വിദ്യാർഥികൾക്ക് നിഷേധിക്കരുതെന്നും അദ്ദേഹം ആവശ്യപ്പെട്ടു. 

അതേസമയം, ജന്തർ മന്തറിലെ പ്രതിഷേധങ്ങളിൽ പങ്കെടുക്കുന്നത് നിയമപരവും അച്ചടക്കപരവുമായ നടപടികൾക്ക് ഇടയാക്കാമെന്ന് മുന്നറിയിപ്പ് നൽകി ജെ.എൻ.യുവും ഡൽഹി സർവകലാശാലയും വിദ്യാർഥികൾക്കും അധ്യാപകർക്കും അഡ്വൈസറികൾ പുറത്തിറക്കിയിരുന്നു. ഇതോടെയാണ് വിഷയത്തിൽ രാഷ്ട്രീയ വിവാദം ശക്തമായത്.